Իբրահիմովիչը նշել է, թե որ ակումբում կցանկանար խաղալ
ՍՊՈՐՏ
Շվեդ նախկին ֆուտբոլիստ Զլատան Իբրահիմովիչը, ով այժմ հանդիսանում է «Միլանի» նախագահի խորհրդականը, հանդես է եկել բազմաթիվ երկրներում և ակումբներում։
Նա հասցրել է ուրախացնել «Մալմյոյի», «Այաքսի», «Յուվենտուսի», «Ինտերի», «Միլանի», «Բարսելոնայի», ՊՍԺ-ի, «Լոս Անջելես Գալաքսիի» և «Մանչեսթեր Յունայթեդի» երկրպագուներին: Սակայն կար մի առաջնություն, որին շվեդն այդպես էլ չհասավ։
Sports Illustrated-ին տված հարցազրույցում Իբրահիմովիչին հարցրեցին՝ արդյոք չի մտածել Գերմանիա տեղափոխվելու մասին:
«Ֆուտբոլը Գերմանիայում պարզապես հիասքանչ է։ Ինձ շատ են դուր գալիս այնտեղի մարզադաշտերը, որովհետև դրանք միշտ լիքն են։
Խաղալ նման ակումբում, ինչպիսին «Բավարիան» է, իհարկե, լավ կլիներ, թեկուզ միայն ակումբի պատմության և նրա խաղացողների պատճառով։ Ինձ համար «Բավարիան» աշխարհի հինգ ամենամեծ ակումբներից մեկն է։ Ես շատ եմ հիանում գերմանական ֆուտբոլով և իրենց ազգային հավաքականով։
Նրանք չէին կարող իրենց թույլ տալ ձեռք բերել ինձ (ծիծաղում է): Բայց ոչ, անկեղծ ասած՝ Գերմանիա տեղափոխվելու հնարավորություն երբեք չի եղել։ Հրաշալի կլիներ, սակայն ճակատագիրն այլ ծրագրեր ուներ»,- ասել է շվեդը։
