Հայաստանում մեկնարկել է մաքսատուրքերի փոխհատուցման ծրագիր արտահանողներին աջակցելու նպատակով
ՀԱՍԱՐԱԿՈՒԹՅՈՒՆ
Հայաստանի կառավարությունը իրավական ակտերի միասնական հարթակում «e-draft» ներկայացրել է արտահանման խթանմանն ուղղված մաքսատուրքերի փոխհատուցման ծրագրի նախագիծը, գրում է Alta.ru-ն։
Նախաձեռնությունը մշակվել է էկոնոմիկայի նախարարության կողմից` ի պատասխան տրանսպորտային ծախսերի ավելացման և լոգիստիկ դժվարությունների, որոնց բախվում են հայ արտադրողները միջազգային շուկաներ դուրս գալու ժամանակ։
Նախագծի համաձայն արտահանողներին կփոխհատուցվի մաքսատուրքերը, որոնք սահմանվել են այն երկրներում, որտեղ ներմուծվում է հայկական արտադրանք։ Փոխհատուցման չափը կորոշվի` ելնելով արտահանվող ապրանքների մաքսային արժեքից և կհամապատասխանի ներմուծող երկրի օրենսդրությամբ սահմանված մաքսատուրքերի դրույքաչափերին։
Ծրագիրը նախատեսվում է ֆինանսավորել պետական բյուջեից։
Ծրագիրը կիրականացվի փուլերով` հաշվի առնելով պետական բյուջեի հնարավորությունները և շահառուների կարիքները։
Կառավարության կանխատեսումների համաձայն այս նախաձեռնությունը պետք է նպաստի հայկական արտադրանքի արտահանման ծավալների ավելացմանը, միջազգային շուկաներում «հայկական ապրանքանիշի» ճանաչելիության ամրապնդմանը և արտահանման ուղղությունների դիվերսիֆիկացմանը։
Աջակցման այս միջոցառումը հասանելի է ինչպես արտահանման գործունեությամբ զբաղվող կազմակերպություններին, այնպես էլ անհատ ձեռնարկատերերին, և կոչված է առավել բարենպաստ պայմաններ ստեղծել արտաքին շուկաներում հայկական արտադրանքի առաջմղման համար:
Նյութը հրապարակման պատրաստեց Կամո Խաչիկյանը
