Ռուս գիտնականները հայտարարում են նավթարդյունաբերության համար թռչող անօդաչու բեռնատարների ստեղծման մասին
ՄԻՋԱԶԳԱՅԻՆ
Ռուսաստանը սկսել է անօդաչու թռչող բեռնատարների մշակումը, որոնք նախատեսված են նավթարդյունաբերության ոլորտում աշխատելու համար, գրում է overclockers.ru-ն: Ազգային տեխնոլոգիական նախաձեռնության Aeronet կլաստերի մասնագետների կողմից ստեղծված այդ սարքերը կկարողանան տեղափոխել մինչև 750 կգ քաշով բեռ մինչև 700 կմ հեռավորության վրա։ Սկզբի համար նման անօդաչու թռչող սարքերը կմշակվեն հեռավոր և դժվար հասանելի վայրերում օգտագործելու նպատակով, որտեղ առաքման ավանդական մեթոդները հաճախ անարդյունավետ են:
Նոր մոդելների առանցքային հատկանիշներից է լինելու էքստրեմալ եղանակային պայմաններում աշխատելու ունակությունը։ Նրանք կկարողանան աշխատել -55°C-ից +45°C ջերմաստիճանում, ինչը նրանց իդեալական է դարձնում բեռները հյուսիսային շրջաններ հասցնելու համար: Սարքերի կորպուսը պատրաստված կլինի թեթև կոմպոզիտային նյութերից, ինչը ոչ միայն կհեշտացնի դրանց հավաքումը, այլ նաև կնվազեցնի վառելիքի ծախսերը։
Մշակումը ներառում է երկու մոդել՝ WingedBull 01XS 250 կգ բեռնատարողությամբ և ավելի հզոր WingedBull 01XL 750 կգ բեռ տեղափոխելու ունակությամբ։ Երկու մոդելներն էլ համալրված կլինեն ժամանակակից ուժային համակարգերով, այդ թվում ներքին այրման շարժիչների և էլեկտրաշարժիչների համակցությամբ: Flying Trucks ընկերության գլխավոր տնօրեն Անտոն Բլիկը նշել է, որ սովորական AI-95 բենզինի օգտագործումն այդ սարքերը կդարձնի մատչելի և ծախսարդյունավետ։ Նախատեսվում է, որ առաջին անօդաչու սարքերը շուկա կմտնեն մինչև 2025 թվականի ավարտը։ Ներկայումս մշակողները բանակցություններ են վարում նավթագազային արդյունաբերության խոշոր խաղացողների հետ այդ նոր տեխնոլոգիաների ներդրումն ապահովելու համար։ Բլիկը նաև ընդգծել է, որ նոր սարքերը զգալիորեն կնվազեցնեն բեռների առաքման ժամանակը, ինչը հատկապես կարևոր է այնպիսի արտակարգ իրավիճակներում, ինչպիսիք են բժշկական պարագաների տեղափոխումը։
Այնուամենայնիվ, փորձագետները զգուշացնում են ծանր անօդաչու սարքերի հավաստագրման և շահագործման հետ կապված հնարավոր դժվարությունների մասին: NTI Up Great տեխնոլոգիական մրցույթների զարգացման գծով տնօրեն Յուրի Մոլոդիխը նշել է, որ 30 կգ-ից ավելի թռիչքի քաշ ունեցող ինքնաթիռների հավաստագրման գործընթացը մնում է բարդ և ծախսատար: Շուկայի մրցակցությունը նաև պահանջում է մշակողներից բարելավել այդ թռչող սարքերի հուսալիությունը և պարզեցնել սպասարկումը:
Այնուամենայնիվ, անօդաչու թռչող սարքերի տեխնոլոգիայի ներդրումը կարող է զգալիորեն բարելավել նավթարդյունաբերություն լոգիստիկայի արդյունավետությունը և բարելավել անվտանգությունը: Հաշվի առնելով բոլոր մարտահրավերները ռուսական անօդաչու սարքերը մեծ ներուժ կունեն շուկայում։ Բեռնափոխադրումների համար դրանց օգտագործումը տնտեսապես ավելի շահավետ կդառնա, քան ավանդական ուղղաթիռների օգտագործումն է։ Մինչև 2030 թվականը նախատեսվում է տարեկան արտադրել մինչև 150 նման բեռնատար անօդաչու թռչող սարք, ինչը նոր հնարավորություններ կբացի երկրում տրանսպորտային ենթակառուցվածքների զարգացման համար։
Նյութը հրապարակման պատրաստեց Կամո Խաչիկյանը
