Փորձագետ. Արևմուտքի կողմից օգտագործվում են երկակի ստանդարտներ
ՔԱՂԱՔԱԿԱՆՈՒԹՅՈՒՆ
Արևմտյան որոշ ուժեր՝ օգտագործելով ակնհայտ երկակի ստանդարտներ, ցնցում են Վրաստանի ներքաղաքական իրավիճակը։ Tass.ru-ի հետ զրույցում նման կարծիք է հայտնել ՀՀ ԱԳՆ նախկին հատուկ դեսպան, «Լուսավոր Հայաստան» կուսակցության նախագահ Էդմոն Մարուքյանը։
«Վրաստանում սկսվել են հետընտրական գործընթացներ, որոնք շատ կանխատեսելի էին: Ընդդիմադիր ուժերը վայելում են Արևմուտքի աջակցությունը, արևմտյան կառույցները պահանջում են հետաքննություն և չեն շնորհավորում Բիձինա Իվանիշվիլիի կուսակցությանը: Օրինակ, Եվրոպական խորհրդի ղեկավար Շառլ Միշելը ժամանակին շնորհավորել է Ադրբեջանի նախագահ Իլհամ Ալիևին` 5-րդ անգամ ընտրվելու կապակցությամբ»,- ասել է նա։
Մարուքյանը նշել է, որ Մոլդովայի նախագահական ընտրությունների ժամանակ այդ երկրի Կենտրոնական ընտրական հանձնաժողովը հրաժարվել էր գրանցել պետության ներկայիս ղեկավար Մայա Սանդուի հակառակորդ Իգոր Մունտեանուին, ով արևմտամետ քաղաքական գործիչ է, սակայն դրանից հետո նույն Եվրոպական խորհուրդի նախագահ Շառլ Միշելը որևէ հայտարարություն չէր արել։ «Վրաստանի դեպքում մենք նման օրինակ չունենք, բայց Արևմուտքն ավելի խիստ հայտարարություններ է անում այդ երկրի վերաբերյալ, քան Մոլդովայի դեպքում»,- ընդգծել է նա։
Նախկին դեսպանը նաև նշել է, որ Վրաստանի կայունությունը շատ կարևոր է Հայաստանի համար։ «Հայաստանի համար շատ կարևոր է, որ Վրաստանի ներքաղաքական և արտաքին քաղաքական խնդիրները լուծվեն խաղաղ, հանգիստ գործընթացների արդյունքում, քանի որ մենք գիտենք, թե ինչպես են այնտեղ տեղի ունեցող ցնցումները ազդում Հայաստանի տնտեսության վրա», - պարզաբանել է Մարուքյանը։
Նյութը հրապարակման պատրաստեց Կամո Խաչիկյանը
