Հայաստանը կփորձի նոր ատոմակայանը կառուցել մինչև գործող ատոմակայանի ժամկետի ավարտը. Սանոսյան

Հայաստանը ցանկանում է նոր ատոմակայան կառուցել մինչև գործող ատոմակայանի ժամկետի ավարտը՝ 2036 թվականը. նորը նախնական պատկերացումներով կլինի 400-600 Մվտ հզորությամբ։ Այն պետք է կառուցել այն չափի, որ այնքան մեծ չլինի, որ կարողանա կլանել ամբողջ էներգետիկ համակարգը։

«Արմենպրես»-ի հաղորդմամբ՝ այս մասին հայտարարեց ՀՀ ՏԿԵ նախարար Գնել Սանոսյանը՝  Համաշխարհային հայկական գագաթնաժողովի ընթացքում՝ անդրադառնալով հարցին, որ վերջին շրջանում շատ է խոսվում Հայաստանում նոր ատոմակայան կառուցելու թեմայի շուրջ։

Նախարարի դիտարկմամբ՝ Հայաստանում էներգետիկ ոլորտը բավականին հետաքրքիր կառուցվածք ունի. երկրի էլեկտրաէներգիայի մոտ 40 տոկոսն արտադրում է ատոմակայանը, մոտ 30 տոկոսը՝ ՋԵԿ-երը, մոտ 20 տոկոսը՝ ՀԵԿ-երը և մոտ 10 տոկոսն արտադրում են արևային կայանները։

«Ի ուրախություն մեզ, եթե մենք մի քանի տարի հետ գնանք, ապա կտեսնենք, որ արևային կայանների բաժինը զրոյին բավական մոտ էր կամ 1 տոկոս էր, և այս 10 տոկոսը, որը հիմա ունենք, բավական արագ տեմպով հիմա աճում է և այնքան արագ, որ մեր ռազմավարության մեջ նշված թիրախներից մի փուլ առաջ ենք ընկել», - ասաց Սանոսյանը՝ հավելելով, որ այդուհանդերձ, հաճախ է խոսվում էներգետիկ առումով կախվածության մասին, սակայն ընդհանրապես որևէ ռեսուրսից կախված չլինել հնարավոր չէ։

Գնել Սանոսյանը նկատեց, որ որքան էլ որ խրախուսվեն վերականգնվող էներգիայի աղբյուրներն, այնուամենայնիվ, հենց նույն արևային կայանն էլ կախված է արևից, ինչպես օրինակ՝ քամու կայանը կախված է քամու առկայությունից։

«Ընդհանուր առմամբ, մեր երկրի էներգետիկ համակարգը նրանով է լավ, որ մեկ ուղղությամբ շատ մեծ կախվածություն չունի։ Այս դրական կողմը բերել է մեզ այն եզրակացության, որ ակնհայտ է՝ նոր ատոմակայան պետք է կառուցել, բայց նորից պետք է կառուցել այն չափի ատոմակայան, որ ինքն այնքան մեծ չլինի, որը կկլանի ամբողջ էներգետիկ համակարգը, որովհետև մեր երկրում սպառվում է 800-1000 Մվտ հզորությամբ էլեկտրաէներգիա և եթե մենք կառուցենք 1000-1200 Մվտ հզորությամբ ատոմակայան, ապա կստացվի, որ երկրի ամբողջ էներգետիկ համակարգը  կախված կլինի ատոմակայանից՝ իր դրական և բացասական կողմերով», - ընդգծեց Գնել Սանոսյանը։

Վերջինիս դիտարկմամբ՝ գործող ատոմակայանի ժամկետը նախ պետք է երկարացնել մինչև 2036 թվականը, ինչի ուղղությամբ այս պահին մեծ ծավալի աշխատանքներ են իրականացվում։ 

«Իսկ 2036 թվականին մեր միտքն այն է, որ պետք է ունենալ նոր ատոմակայան․ նախնական մեր պատկերացումն այն է, որ այն կլինի 400-600 Մվտ հզորությամբ, որպեսզի փոխարինի գործող ատոմակայանին», - մանրամասնեց Սանոսյանը՝ շեշտելով, որ Կառավարությունը շարունակում է խրախուսել արևային կայանների տարածումը։

Նա հավելեց, որ այժմ բավականին հետաքրքիր ծրագրեր կան, որոնք կապված են քամու կայանների տեխնոլոգիայի հետ, և դրանք ընթացքի մեջ են։

«Կարծում եմ՝ վարվող այս քաղաքականությունը բալանսավորված է և ճիշտ, ու մենք ոչ միայն սեփական էներգետիկ պահանջները կարողանում ենք բավարարել, այլև էլեկտրաէներգիա արտահանող երկիր ենք և ցանկություն ունենք այդ արտահանման ծավալները մեծացնել։ Մասնավորապես, Իրանի հետ հիմա կառուցվում են էլեկտրահաղորդման մեծ գծեր, որոնք կավելացնեն դեպի Իրան արտահանվող  էլեկտրաէներգիայի թողունակությունը, իսկ մենք Իրանի հետ ունենք բավական հետաքրքիր և երկու երկրների համար օգտակար պայմանագիր, որով իրանական գազը, ներմուծվելով Հայաստան, վերածվում է էլեկտրաէներգիայի և արտահանվում է Իրան», - մանրամասնեց ՏԿԵ նախարարը: