Հայաստանի մասին խանդավառ ակնարկ. Չպետք է վախենալ գնալ տարբեր վայրեր
ՖՈՏՈ
«Тонкости туризма» հեռագրային ալիքի ակնարկն է ներկայացրել Dzen.ru-ն:
«Այցելեցի Հայաստան 2023 թվականի սեպտեմբերին։ 2 շաբաթ ուսումնասիրեցի ինչպես մայրաքաղաքը, այնպես էլ շրջակայքը։ Երկիրը փոքր է տարածքով, ինչը պլյուս է զբոսաշրջության համար, հիմնական տեսարժան վայրերը գտնվում են Երևանից մեքենայով 1-2 ժամ հեռավորության վրա: Կարող եմ ասել, որ Հայաստանը հարմար է սկսնակ ճանապարհորդների համար, տեղացիները խոսում են ռուսերեն և բարեհամբույր են հյուրերի նկատմամբ։ Երկիրը հարմար է նաև փոքր երեխաներով զբոսաշրջիկների համար, հայերը երեխաներ շատ են սիրում։
Ես ինքս կազմակերպեցի ճամփորդությունը, գտա ուղիղ չվերթ, իսկ ապրելու համար ստուդիո բնակարան ընտրեցի Երևանում՝ Արարատ գործարանի մոտ, որտեղից քաղաքի կենտրոն ճանապարհը ոտքով 15 րոպե է։ Մայրաքաղաքում բնակարանների բազմաթիվ տարբերակներ կան՝ հյուրանոցներ, հյուրատներ, բնակարաններ ցանկացած բյուջեի համար։ Օդանավակայան ժամանելուն պես խորհուրդ եմ տալիսերկար չմնալ այնտեղ, ավելի ձեռնտու է արժույթը փոխանակել քաղաքում, իսկ տաքսի պատվիրել հավելվածի միջոցով։ Եթե նախատեսում եք պատրաստել ձեր սեփական սնունդը, ապա կան մի քանի լավ սուպերմարկետների ցանցեր, բայց ես խորհուրդ եմ տալիս միրգ և բանջարեղեն գնել ձեր տան մոտ գտնվող խանութներից կամ կրպակներից, որակը նույնն է, բայց գինը ցածր է:
Եթե խոսենք հանգստի մասին, ապա մայրաքաղաքում կան թանգարաններ նվիրված թե՛ հայ ժողովրդի պատմությանը, թե՛ կոնկրետ անհատականությունների, որոնք հայտնի են հետխորհրդային տարածքում։ Խորհուրդ եմ տալիս բարձրանալ Կասկադի գագաթը։ Եթե դժվարանում եք կամ չեք ցանկանում բարձրանալ, ապա շենքի ներսում կան շարժասանդուղքներ, ինչպես նաև` արվեստի թանգարան: Մոտակայքում է Հաղթանակի այգին՝ Մայր Հայաստանի վեհաշուք արձանով։ Այգին, ինչպես Կասկադը, առաջարկում է քաղաքի գեղեցիկ համայնապատկերը: Երևանում կան տարբեր ձևաչափերի և գնային միջակայքերի բազմաթիվ հաստատություններ։ Ես ձեզ խորհուրդ կտայի նախ փորձել տեղական խոհանոցը և, եթե այն ձեզ դուր է գալիս, հետևեք այդ սննդակարգին:
Այո, դուք կարող եք գտնել սուշի բարեր և արագ սննդի կետեր, բայց գները բարձր են, և բաղադրիչների որակը լավագույնը չէ: Տեղական խոհանոցի ռեստորանների առավելությունները շատ են, առատ չափաբաժիններ և անձնակազմի ուշադիր վերաբերմունք հյուրերի նկատմամբ: Կոնկրետ ուտեստներից ու խորտիկներից խորհուրդ եմ տալիս լամաջո (պարտադիր պանրով), տոլմա և սուջուխ։ Կրկին, քաղաքում ճաշելու շատ տարբերակներ կան, այնպես որ մի վախեցեք փորձել տարբեր վայրեր:
Մայրաքաղաքից դուրս կան բազմաթիվ հետաքրքիր վայրեր հնագույն շինություններով և տպավորիչ լեռնային լանդշաֆտներով: Խորհուրդ եմ տալիս սկսել երկիրն ուսումնասիրել դասական շրջագայությամբ՝ Խոր Վիրապ - Գառնի - Գեղարդ, մեկ օրում կայցելեք Արարատ լեռան լավագույն տեսարանով կետերը, կծանոթանաք երկրում քրիստոնեության զարգացման պատմությանը, կտեսնեք կիրճ՝ բազալտե սյուներով և ժայռի մեջ փորագրված հնագույն վանք։
Ուզում եմ նշել նաև Ամբերդ ամրոցը և դեպի այնտեղ տանող գեղատեսիլ ճանապարհը, որը մեքենայով տևում է ոչ ավելի, քան մեկ ժամ։ Մեկ այլ հայտնի ուղղություն Դիլիջանն է, որը մեքենայով տևում է 1,5–2 ժամ: Այստեղ դուք կտեսնեք ազգային պարկի տարբեր, բայց ոչ պակաս տպավորիչ լանդշաֆտներ։ Շրջագայությունների հայտնի վայր է նաև Սևանը` Կովկասի ամենամեծ լիճը: Եթե ցանկանում եք ծովափնյա հանգիստ անցկացնել, խորհուրդ եմ տալիս մնալ մի քանի օր։ Գոյություն ունեն կացարանների մի շարք տարբերակներ, դուք կարող եք պատվիրել հյուրանոցային սենյակ կամ տեղ վարձել ճամբարում:
Կցանկանայի մի փոքր ավելին ասել իմ ճանապարհորդության արժեքի մասին։ Երկուղի թռիչքն արժեցել է 35 հազար ռուբլի, կացարանը ստուդիայում 20 հազար ռուբլի: Երևանից մեկնելով 1-2 օրով շրջագայությունը կարող է արժենալ 5000-ից մինչև 12 հազար ռուբլի` կախված երթուղու տևողությունից: Ինչ վերաբերում է քաղաքում սննդին և ժամանցին, ապա այն օրական 3000 ռուբլի է, քանի որ ես չեմ այցելել Պրեմիում հատվածի հաստատություններ, և շատ թանգարաններ անվճար են:
Ես ինքս որոշեցի, որ Հայաստանի գլխավոր գրավչությունը նրա բնությունն է։ Երևանն ունի շատ զվարճանքներ և հաստատություններ` համեղ ուտելիքներով, բայց քաղաքի փողոցներում արագ սկսում ես հոգնել՝ շատ մարդիկ կան, մեքենաներ, և դրա պատճառով օդը բավականին խեղդող է։ Ուստի խորհուրդ եմ տալիս հնարավորինս շատ շրջագայություններ ներառել ձեր երթուղու մեջ:»
Նյութը հրապարակման պատրաստեց Կամո Խաչիկյանը
