ՌԴ-ն անօդաչու սարքերով և հրթիռներով գրոհել է Ուկրաինայի էներգետիկ օբյեկտները

Հուլիսի 26-ի գիշերը ռուսական զորքերը հարձակվել են Ուկրաինայի վրա՝ օգտագործելով 22 «Շահեդ» գրոհային անօդաչու թռչող սարքեր, ասել է Ուկրաինայի Զինված ուժերի ռազմաօդային ուժերի հրամանատար Նիկոլայ Օլեշչուկը։ Նրա խոսքով՝ Ուկրաինայի հակաօդային պաշտպանության ուժերը Խերսոնի, Սումիի, Ժիտոմիրի և Չեռնիգովի շրջաններում 20 անօդաչու թռչող սարք են խոցել, հայտնում է Meduza-ն։

Բացի այդ, հավելել է Օլեշչուկը, ռուսական զորքերը «Իսկանդեր-Մ» համալիրից արձակված բալիստիկ հրթիռով հարձակվել են Դոնեցկի շրջանի վրա։ Ուկրաինական լրատվամիջոցները միևնույն ժամանակ հրապարակել են լուսանկար Կրամատորսկից, նկարում երևում է, որ երկինք է բարձրանում թանձր սև ծուխը։ Արդյոք դա կապված է հրթիռային հարվածի հետ, հայտնի չէ: Տարածաշրջանի իշխանությունները դեռ չեն մեկնաբանել Կրամատորսկում պայթյունի մասին լուրերը:

Ukrenergo ընկերությունը հայտնել է, որ ռուսական անօդաչու թռչող սարքերը հարվածել են Ժիտոմիրի և Չեռնիգովի շրջանների էներգետիկ օբյեկտներին։ Ժիտոմիրի շրջանի սպառողները մնացել են առանց էլեկտրականության։ Մինչ առավոտ էլեկտրամատակարարումը վերականգնվել է, վերանորոգման աշխատանքները շարունակվում են, հավելել են ընկերությունից։

Ժիտոմիրի շրջանային ռազմական վարչակազմի ղեկավար Վիտալի Բունեչկոն հայտնել է, որ տարածաշրջանում հակաօդային պաշտպանության ուժեր են աշխատում։ Նրա խոսքով՝ անօդաչու թռչող սարքերի բեկորները վնասել են քաղաքացիական ենթակառուցվածքները և էներգետիկ օբյեկտները։ Նա նշել է, որ խաղաղ բնակիչներ չեն տուժել։

Չեռնիգովի մարզում հարձակման են ենթարկվել Նիժին քաղաքի ենթակառուցվածքի օբյեկտը և բնակելի հանրակացարանը, վիրավորվել է մեկ խաղաղ բնակիչ, հայտնել է շրջանի ղեկավար Վյաչեսլավ Չաուսը։

Դնեպրոպետրովսկի մարզում կամիկաձե անօդաչու թռչող սարքերի հարձակման ժամանակ ենթակառուցվածքները վնասվել են, հայտնել է շրջանային ռազմական վարչակազմի ղեկավար Սերգեյ Լիսակը։ Նրա խոսքով՝ ոչ ոք չի տուժել։

Խերսոնի մարզում, ըստ շրջանի ղեկավար Ալեքսանդր Պրոկուդինի, հակաօդային պաշտպանության ուժերը խոցել են 10 Shahed անօդաչու թռչող սարք։ Բեկորների անկման հետևանքով Խերսոնում հրդեհներ են բռնկվել և արագ մարվել, ասել է Պրոկուդինը։