Քաղաքագետը մատնանշել է Հայաստանի փորձերը՝ Ղարաբաղի հետ կապված իրավիճակի մեղքը բարդել Ռուսաստանի վրա
ՔԱՂԱՔԱԿԱՆՈՒԹՅՈՒՆ
Լեռնային Ղարաբաղի կորստի պատասխանատվությունը մեծապես կրում է Հայաստանի ներկայիս ղեկավարությունը, մինչդեռ Երևանը փորձում է մեղքը բարդել Ռուսաստանի վրա, Iz.ru-ի հետ զրույցում ասել է ՄԳԻՄՕ-ի Միջազգային անվտանգության կենտրոնի առաջատար հետազոտող Վիկտոր Միզինը:
Հիշեցնենք, որ ավելի վաղ Հայաստանի Անվտանգության խորհրդի քարտուղար Արմեն Գրիգորյանը հայտարարել էր, որ Ռուսաստանը «գրավել է» Լեռնային Ղարաբաղը, այնուհետև այն հանձնել Ադրբեջանին։
«Հայաստանի ղեկավարությունը ոչինչ չարեց Լեռնային Ղարաբաղը ինչ-որ կերպ պահպանելու կամ նույնիսկ դիվանագիտորեն պաշտպանելու համար։ Մի տեսակ թեթևություն, անհասություն կար։ Եվ այդպես էլ եղավ։ Հայաստանում խոսում են ՀԱՊԿ-ից դուրս գալու մասին: Ռուսաստանին դուր չի գալիս, որ Հայաստանն, այսպես ասած, շարժվում է դեպի Արևմուտք, արդեն բազմաթիվ ազդակներ են եղել, ընդհուպ մինչև ռազմատեխնիկական համագործակցություն հաստատելու աստիճան։ Ռուսաստանի և Հայաստանի հարաբերություններն ակնհայտորեն լարված են: Իհարկե, ռուսական կողմը այդ մեղադրանքները կմերժի։ Սա բացարձակապես ոչ դրական դեմարշների փուլ է»,- ասել է Միզինը:
Քաղաքագետի խոսքով` երբ ներքին խնդիրներ ու լարվածություն են առաջանում, փորձ է արվում մեղադրել ինչ որ արտաքին գործոնի, ինչն էլ այս դեպքում անում է Երևանը:
«Ասում են, որ «բոլորս սպիտակ ենք, կապ չունեցեք, ճնշումներ են եղել, մեզ դավաճանել են և այլն»։ Նրանք առաջ են քաշել այն թեզը, որ Ռուսաստանը ոչ մի կերպ չի պաշտպանել Հայաստանին ԼՂ հարցում և չի արդարացրել իրենց հույսերը ՀԱՊԿ ֆորմատով։ Հայաստանի ղեկավարության կարծիքով ՀԱՊԿ-ն ընդհանրապես չի աշխատում: Այդ գիծը վաղուց է շարունակվում»,- ասել է նա։
Միևնույն ժամանակ, հրատարակության զրուցակիցն ասել է, որ Երևանը «պետք է լավ մտածի» նախքան Ռուսաստանի և Արևմուտքի միջև ընտրություն կատարելը։ «Արևմուտքը անվտանգության առումով երբեք չի տա Հայաստանին այնքան, որքան Ռուսաստանն է տվել և կտա։ Դա պետք է հասկանալ: Էլ չխոսենք պատմամշակութային կապերի մասին»,- եզրափակել է Միզինը:
Նյութը հրապարակման պատրաստեց Կամո Խաչիկյանը
