Եկեղեցու ճակատագրական ընտրությունը․ «Հրապարակ»
ՄԱՄՈՒԼԻ ՏԵՍՈՒԹՅՈՒՆ
«Հրապարակ» օրաթերթը գրում է․
Տարբեր աղբյուրներ արդեն քանի օր է՝ տեղեկություններ են տարածում, եթե օրերս տեղի է ունեցել Գարեգին Բ վեհափառ հայրապետի հանդիպումը Բագրատ արքեպիսկոպոս Գալստանյանի հետ, ով առաջնորդում է «Տավուշը հանուն հայրենիքի» շարժումը, որն արդեն համաժողովրդականություն է վայելում։ Ըստ որոշ տեղեկությունների, Հայ առաքելական եկեղեցին` Գարեգին Բ-ի գլխավորությամբ, հակված է շարժման առաջնորդությունը քաղաքական ուժերին հանձնել։
Հոգեւորականների շրջանում կա նաեւ կարծիք, որ շարժման ձախողումը կսասանի ամենայն հայոց կաթողիկոսական գահը եւ կվնասի հայ եկեղեցու հեղինակությանը, ուստի առաջարկում են հայտարարությամբ հանդես գալ` կրկին վերահաստատել իրենց դիրքորոշումը երկրի համար ճակատագրական պահին եկեղեցու դերակատարման հետ կապված, շեշտել, որ սա ոչ թե քաղաքական պայքար է, այլ հանուն հայրենիքի շարժում, նշել, որ սկիզբը դրված է, եւ եկեղեցին ու Բագրատ սրբազանը շարժել են անշարժելին` մեծ թվով մարդկանց են համախմբել եւ հասարակությանը հանել են թմբիրից, հիմա եկել է քաղաքական ուժերի գործելու ժամանակը, որովհետեւ իմպիչմենթի, իշխանափոխության խնդիրը քաղաքական պահանջներ են, ուստի պետք է քաղաքական ուժերը գան առաջին պլան` եկեղեցուց վերցնեն էստաֆետը: Իհարկե, եկեղեցում կան նաեւ շատ անհատներ, որոնք դեմ են այս քայլին, կարծում են, որ եկեղեցին կհեղինակազրկվի, հանրությունը կհիասթափվի եւ կկարծի, թե Վեհափառը կրկին գործարքի է գնացել իշխանությունների հետ։ Բագրատ սրբազանը, նախօրեին արձագանքելով Վեհափառ հայրապետի հետ հանդիպման լուրերին, առանց մասնավորեցնելու հայտարարեց, որ կաթողիկոսի հետ պարբերաբար հանդիպում է, վերջին անգամ նախօրեին է հանդիպել:
Հարցին՝ որեւէ փուլում շարժման ղեկավարությունը կփոխանցի՞ քաղաքական ուժերին, պատասխանեց. «Թող գան-վերցնեն, ով ցանկանում է։ Ես բոլորի հետ խոսում եմ, բացի իրենց քաղաքական, հասարակական գործիչ լինելուց, անձնական մտերմություն էլ ունեմ բոլորի հետ անխտիր»։ Իսկ Ժուռնալիստների միությունում նա խուսանավեց իրեն մի քանի անգամ ուղղված նույն հարցից՝ արդյո՞ք վարչապետ դառնալու համար ստացել է Վեհափառի օրհնությունը, եւ արդյո՞ք հարթակում առաջիկայում կտեսնենք հոգեւոր դասի այլ ներկայացուցիչների։ «Վեհափառն ինձ ամեն օր էլ օրհնում է»,- կատակեց նա եւ հումորով արձագանքեց, թե այլեւս հարթակ չկա, որ հոգեւորականներին հարթակում տեսնենք, նկատի ուներ, որ Հանրապետության հրապարակի բեմահարթակը երկու օր առաջ ապամոնտաժվել է։
Հիշեցնենք․ շարժման առաջին իսկ օրվանից Բագրատ սրբազանը հաճախ է հնչեցնում «Վեհափառի օրհնությամբ» արտահայտությունը, վերջին հանրահավաքի իր ելույթում ասաց, որ Աստծո կամոք, Վեհափառի օրհնությամբ եւ ժողովրդի ցանկությամբ պատրաստ է ստանձնել ցանկացած պատասխանատվություն։ «Սակայն կան հարցեր, որոնց վերաբերյալ պետք են եւ անհրաժեշտ են իրավական դաշտում, իրավաբանների հետ քննարկումներ, որոնք, վստահ եմ, երկու օրվա ընթացքում կհստակեցվեն»,- ասաց սրբազանը՝ ակնարկելով իր երկքաղաքացիության արգելքը վարչապետի թեկնածու առաջադրվելու համար։
«Տավուշը հանուն հայրենիքի» շարժման ակտիվի ներկայացուցիչ, պատգամավոր Գառնիկ Դանիելյանին երեկ հարցրինք՝ բացառո՞ւմ է, որ որեւէ փուլում շարժման առաջնորդությունը կփոխանցվի քաղաքական ուժերին, հատկապես որ նման լուրեր ունենք` եկեղեցին մտադիր է նահանջել։ «Ոչ, չկա նման բան, այս պահին ո՛չ մեր ծրագրերում, ո՛չ էլ նպատակներում նման բան չկա, չի քննարկվում, շարժումն առաջնորդում է սրբազանը»,- ասաց Դանիելյանը։ Հարցրինք իմպիչմենթի գործընթաց սկսելու ժամկետների մասին՝ կա՞ն վարչապետի թեկնածուի հարցի քննարկումներ եւ ո՞ր ուժերի հետ։ «Մենք ունենք հստակ առաջնորդություն, այն շարժումը, որը նաեւ ես եմ ներկայացնում, ունի հստակ առաջնորդ, դա Բագրատ սրբազանն է, այդ առաջնորդությամբ էլ շարժվում ենք առաջ՝ Բագրատ սրբազանի գլխավորությամբ»: Ճշտող հարցին՝ այսինքն, այս պահին վարչապետի թեկնածուի հարց չի՞ քննարկվում, պատասխանեց։ «Հիմա պրոցեսներ են գնում, էլի եմ կրկնում՝ գնում ենք առաջ մեր առաջնորդ Բագրատ սրբազանի գլխավորությամբ, ինքը կորոշի: Ինչ կորոշի, մենք էլ դրա հետ կհամաձայնենք»։
Նկատենք, որ Բագրատ սրբազանի վերջին հայտարարություններից ակնհայտ է դառնում, որ եթե գա պահը, եւ փողոցի ճնշման ներքո իմպիչմենթի գործընթացն այլեւս այլընտրանք չունենա, չի բացառվում, որ հենց ինքն էլ առաջադրվի՝ անկախ սահմանադրական արգելքից` երկքաղաքացիության հանգամանքից։ Երեկ էլ անդրադառնալով խնդրին, նա ասել է՝ Կանադայի քաղաքացիությունը սոսկ փաստաթուղթ է, անցաթուղթ է եւ վկայություն է, որ այդ երկրում ապրել եմ, եւ շնորհակալ եմ, որ ապրել եմ: «Այդ անձնագիրն ինձ տրվել է պահանջված բոլոր օրինական ճանապարհներով: Մեր երկրի պես «ախպերական» չի տրվում ոչ մի բան: Ամեն վայրկյան այն, ինչ կպահանջվի իմ սեփական երկրին՝ Հայաստանին, Արցախին, որը չարիքի ձեռքով դարձավ հեռավորություն մեզ համար, ինչ որ անհրաժեշտ է եւ կծառայի այդ նպատակին, ես ոչ միայն հրաժարվելու եմ պատրաստ, այլեւ նաեւ ինքս ինձ հանձնելու… Հրաժարվե՞լ է պետք Կանադայի քաղաքացիությունից՝ կհրաժարվեմ, չհրաժարվել է պետք՝ չեմ հրաժարվի: Մեր ճանապարհն ուղիղ ընթացք է: Ինչ պահանջված է, դա էլ կլինի»,- ասաց նա: Սրբազանը նաեւ նկատեց. «Ճգնաժամային այսպիսի ծանր վիճակում եւ պահանջված արմատական փոփոխությունների վիճակում, եթե Տիրոջ կամքն է, որ ամեն ինչ գնա իր ուզելու ճանապարհով, այդպես էլ լինելու է»։
Հոդվածն ամբողջությամբ կարող եք կարդալ «Հրապարակ» թերթի՝ 15․ 05․ 24 թ համարում
