Սենատորը դատապարտել է Փաշինյանին` Պուտինի երդմնակալության արարողությանը չմասնակցելու համար
ՔԱՂԱՔԱԿԱՆՈՒԹՅՈՒՆ
Մայիսի 7-ին ՌԴ նախագահ Վլադիմիր Պուտինի երդմնակալությանը չգնալու Հայաստանի վարչապետ Նիկոլ Փաշինյանի մտադրությունը չի զարդարում երկու երկրների հարաբերությունները, NEWS.ru-ի հետ զրույցում ասել է ՌԴ Դաշնային խորհրդի միջազգային հարցերով փոխնախագահ Անդրեյ Կլիմովը։
Նրա կարծիքով դա հայ քաղաքական գործչի գիտակցված ընտրությունն է։ Սենատորը վստահ է, որ Փաշինյանն իր որոշումը կայացնելիս խորհրդակցել է Ռուսաստանի նկատմամբ ոչ բարեկամական տրամադրված պետությունների իր դաշնակիցների հետ։
-Նրա արարքը չի զարդարում մեր հարաբերությունները։ Ինձ համար դժվար չէ կռահել, թե ինչու է նա դա անում։ Ըստ ամենայնի, սա նրա գիտակցված ընտրությունն է։ Նա, հավանաբար, խորհրդակցել է այդ հարցով՝ ինչպես մենք ենք անվանում նրանց, մեզ ոչ բարեկամ երկրների հետ։ Եթե Փաշինյանը շարունակի խորհրդակցել այդ պետությունների հետ, ապա ռուս-հայկական հարաբերությունները հաստատ չեն բարելավվի,- ասել է Կլիմովը։
Հիշեցնենք, որ հայկական լրատվամիջոցները ավելի վաղ հայտնել էին, որ Փաշինյանը որոշել է չգնալ Մոսկվա Պուտինի երդմնակալության արարողությանը։ Հայաստանի վարչապետը Ռուսաստանում կլինի միայն մայիսի 8-ին՝ մասնակցելու Եվրասիական տնտեսական միության 10-ամյակի հոբելյանական գագաթնաժողովին։
Ավելի վաղ Հայաստանի արտգործնախարար Արարատ Միրզոյանը հայտարարել էր, որ Հայաստանի և Ռուսաստանի հարաբերություններում խնդիրներ կան, սակայն դրանց շուրջ երկխոսություն է տարվում։
Նախարարը հավելել էր, որ այդ չլուծված խնդիրներից մեկը ՀԱՊԿ-ին հանրապետության անդամակցության թեման է։
Նյութը հրապարակման պատրաստեց Կամո Խաչիկյանը
