Ապրիլյան պատերազմի ժամանակ վիրավորված Ռուբեն Առաքելյանի կերակրափողի խնդիրը լուծվել է, նա վարժ խոսում է.

Ապրիլյան պատերազմի ժամանակ վիրավորված Ռուբեն Առաքելյանը, որը բուժում է ստանում Գերմանիայում, իրեն համեմատաբար լավ է զգում, նրա մոտ դրական տեղաշարժ կա: Այս մասինNEWS.am-ի հետ զրույցում  ասաց նրա ազգականներից Հովհաննեսը: Նա նշեց, որ Ռուբենի կերակրափողի հետ կապված խնդիրը լուծվել է, նա արդեն վարժ կարողանում է խոսել. «Նորմալ ա արդեն վիճակը, իր ձայնով վարժ խոսում է»:

Նա նշեց, որ Ռուբենին հաճախ սայլակով զբոսանքի են տանում հիվանդանոցի բակ:

Հիշեցնենք, որ Ռուբեն Առաքելյանը Գերմանիա էր տեղափոխվել հունիսի 13-ին:

Հիշեցնենք, որ 19-ամյա Ռուբենը ծանր վիրավորում էր ստացել ողնաշարի մասում ու նրա վերջույթները հիմա գրեթե անշարժ են: Սակայն գերմանացի բժիշկները, ծանոթանալով Ռուբենի փաստաթղթերին, ասել են, որ ամենայն հավանականությամբ հնարավոր կլինի գոնե մասամբ վերականգնել վերջույթների շարժունակությունը ու օգնել, որ Ռուբենն ավելի ինքնուրույն դառնա: Հայ բժիշկը, որը Ռուբենին մերսումներ է անում, նույնպես ասում է, որ հույս կա՝ նա վստահ չէ, որ Ռուբենի ոսկրածուծն ամբողջովին կտրված է, քանի որ բուժակարգերի ընթացքում զգում է արձագանք նրա նյարդային համակարգի կողմից:

Հիշեցնենք նաեւ, որ Գերմանիայում բուժում ստանալու համար անհրաժեշտ 43 հազար եվրոն պաշտպանության ու առողջապահության նախարարությունների ջանքերով նախապես փոխանցվել է գերմանական կլինիկային: