Մարդը «դաբրո» ունի. մեքենայով Գյումրիի քաղաքապետարան «այցելած» տղամարդը ազատության մեջ է

Արդեն հայտնել էինք, որ ապրիլի 21-ին՝ ոչ աշխատանքային օրով, Գյումրիում քաղաքացին մեքենան կայանել էր քաղաքապետարան բարձրացող աստիճաններին։ Հայտնել էինք նաև, որ քաղաքապետարանի «այցելուն» Գյումրիի քաղաքապետարանի «Կոմունալ ծառայություն» ՀԲԸ-ի ղեկավար Արտավազդ Ոսկանյանի հորեղբոր տղան է՝ Էդգար Ոոսկանյանը։

Oragir.News-ի աղբյուրի փոխանցմամբ՝ օրեր առաջ Գյումրիի քաղաքապետարան ավտոմեքենայով մտնել ցանկացողի հետեւում կանգնած է ՔՊ-ական պատգամավոր, Շիրակի նախկին մարզպետ Կարեն Սարուխանյանը, ում անվան հետ վերջին շրջանում կապվում են մտերիմներին աշխատանքի տեղավորելու դեպքերը, ինչպես նաև քրգործերի կարում-ձևում, ժողովրդի լեզվով ասած՝ մարդկանց գլխի սարքել։

Մեր աղբյուրի խոսքով՝ Գյումրու կոմունալի պետի հորեղբոր տղան ակտիվ հարաբերվում է ՔՊ-ականների հետ, մեքենայով քաղաքապետարան «այցելած» տղամարդը դուրս չի գալիս ՔՊ-ի գրասենյակից, կարճ ասած՝ իրենց վստահելի մարդն է, ով համաձայնվել է աշխատել իշխող «Բալասնյան դաշինքի» դեմ։

«Էդ տղան ընդամենը երկու ժամ է մնացել ոստիկանությունում։ Մարդը «դաբրո» ունի, հլը թող ուրիշը լիներ կաշին կհանեին, իսկ այս դեպքում փաստացի ոտնձգություն է կատարվել, և էդ խուլիգանական արարքը չի պատժվել։

Ծիծաղելի է, որ Գյումրիի քաղաքապետը, ասում էր՝ գուցե ախպերս էղնի պտի պատասխան տա։ Վարդգես Սամսոնյանը էնքան չկա, որ էդ տղայի ապօրինի շինությունները քանդել տա, բիստրոներ է աջ ու ձախ բացել, թե թող դուխ ունենա քանդել տա, ՔՊ-ականները Վարդգեսին տեղը ցույց կտան»,-Oragir.News-ի հետ զրույցում ասում է մեր զրուցակիցը։

Վերջինիս խոսքով՝ ՔՊ-ականների յուրայինը բարձրաստիճան ոստիկան բարեկամ ունի, դրա համար է շատ շնորհքով ներխուժում քաղաքապետարան։

Oragir.News-ը փորձեց կապ հաստատել նաև Էդգար Ոսկանյանի հետ, մեր զանգերին ի պատասխան՝ հայտարարեց, որ ինքը կզանգի, բայց ոչ միայն չզանգեց, այլ մեր հեռախոսազանգերին չի պատասխանում։

Ըստ շրջանառվող լուրերի՝ ՔՊ-ականները ակտիվորեն աշխատում են Գյումրիի քաղաքապետ Վարդգես Սամսոնյանի դեմ։