ՊՆ-ում նիստ է հրավիրվել գերիների, պատանդների և անհայտ կորածների հարցերով
ՊԱՏՄՈՒԹՅԱՆ ԱՅՍ ՕՐԸ
ՀՀ ՊՆ վարչական համալիրում տեղի է ունեցել ՀՀ գերիների, պատանդների եւ անհայտ կորածների հարցերով զբաղվող հանձնաժողովի հերթական նիստը, որի ընթացքում քննարկվել են 2016 թվականի առաջին կիսամյակի ընթացքում հանձնաժողովի կողմից կատարված աշխատանքները, նախանշվել են աշխատանքային հետագա ծրագրերը:
Հանձնաժողովի նախագահ, պաշտպանության նախարար Սեյրան Օհանյանն ընդգծել է, որ հանձնաժողովի գործունեությունն ունի մեծ նշանակություն անհայտ կորած անձանց որոնման, գերության մեջ հայտնվող ՀՀ քաղաքացիներին հայրենադարձելու աշխատանքների եւ նրանց ընտանիքներին ցուցաբերվող օգնության առումով: Նախարարը նաեւ արձանագրել է, որ նախատեսված պլանային միջոցառումները հիմնականում կատարվել են:
Նիստի ընթացքում գերիների, պատանդների եւ անհայտ կորածների հարցերով զբաղվող հանձնաժողովի կատարած աշխատանքների վերաբերյալ զեկույց է ներկայացրել եւ հանձնաժողովին առընթեր աշխատանքային խմբի ղեկավար Արմեն Կապրիելյանը, ով հավաստել է, որ լայն թափով շարունակվում են անհայտ կորած անձանց որոնման աշխատանքները, միջոցներ են ձեռնարկվում նրանց ճակատագրերը պարզելու ուղղությամբ:
Ելույթներով հանդես են եկել նաեւ հանձնաժողովի անդամները, ովքեր ներկայացրել են 2016թ. առաջին կիսամյակի ընթացքում իրականացրած միջոցառումները, անհայտ կորածների ընտանիքներ կատարած այցերի ծրագրերը, հանդես եկել առաջարկություններով: Նիստի ընթացքում ՊՆ Տ եւ ՀԿ վարչության պետ Վարդան Ավետիսյանը ներկայացրել է նաեւ անհայտ կորած ազատամարտիկների հիշատակի օրվա կապակցությամբ հունիսի 29-ին կայանալիք միջոցառումների ծրագիրը:
Ամփոփելով հանձնաժողովի նիստը՝ պաշտպանության նախարար Սեյրան Օհանյանը փաստել է, որ հաշվետու ժամանակահատվածում հանձնաժողովի աշխատանքները եղել են արդյունավետ, առկա են ձեռքբերումներ, որոնց հիման վրա պետք է զարգացնել հաջողությունները: Նախարարը մատնանշել է նաեւ այն հանգամանքը, որ այս տարվա ընթացքում ՀՀ քաղաքացիների` գերության մեջ հայտնվելու դեպքեր չեն արձանագրվել:
Ընդգծելով, որ հանձաժողովին առընթեր աշխատանքային խմբի կողմից մարզեր իրականացված այցելությունները դրական արձագանքների են արժանացել՝ Սեյրան Օհանյանը հանձնաժողովի անդամներին տվել է նաեւ հստակ հանձնարարականներ՝ կարևորելով անհայտ կորածների ընտանիքներին աջակցելու անհրաժեշտությունը:
