Գերմանացի դիվանագետների ընտանիքները լքում են Թեհրանը

Գերմանիայի արտաքին գործերի նախարարությունը Գերմանիայի քաղաքացիներին կոչ է արել լքել Իրանը։ Մի քանի հարյուր մարդ գտնվում է տարհանման ցուցակում։ Իրանի և Իսրայելի միջև ռազմական էսկալացիայի սպառնալիքի պատճառով Գերմանիայի դեսպանատան աշխատակիցների ընտանիքի անդամները այս պահին լքում են Թեհրանը։ Բացի այդ, Թեհրանում և Թել Ավիվում Գերմանիայի դեսպանատները լրացուցիչ անվտանգության միջոցներ են ձեռնարկում, այսօր՝ ապրիլի 13-ին, ասել է Գերմանիայի արտաքին գործերի նախարարության խոսնակը՝ ի պատասխան dpa լրատվական գործակալության հարցման։

ԱԳՆ ներկայացուցիչը նաև նշել է, որ Իրանում բնակվող և երկիրը լքել ցանկացող Գերմանիայի քաղաքացիների ճշգրիտ թիվը մնում է անհայտ, քանի որ արտասահմանում բնակվող գերմանացիները պարտավոր չեն գրանցվել հյուպատոսություններում։ Նախնական տվյալներով՝ խոսքը երկրից հեռանալ ցանկացող եռանիշ թվի մասին է։ Նրանք գտնվում են տարհանման ցուցակում։ Հնարավոր է ընդլայնել այս ցանկը՝ ներառելով Գերմանիայի և Իրանի երկքաղաքացիություն ունեցող անձանց։

Ապրիլի 12-ին Գերմանիայի ԱԳՆ-ն Գերմանիայի քաղաքացիներին կոչ էր արել լքել Իրանը և զերծ մնալ այս երկիր մեկնելուց՝ տարածաշրջանում իրավիճակի արագ վատթարացման պատճառով։ «Չի կարելի բացառել, որ էսկալացիան կարող է ազդել նաև օդային, ցամաքային և ծովային տրանսպորտային երթուղիների վրա՝ համապատասխան հնարավոր սահմանափակումներով Իրան մուտքի և ելքի համար», - ընդգծել է Գերմանիայի ԱԳՆ-ն։