Նիկոլ Փաշինյանը հիմա անելանելի վիճակում է․ Կարեն Քոչարյան

«Մենք դեմ չենք Ադրբեջանի հետ սահմանազատման գործընթացը սկսել ՀՀ Տավուշի մարզի և Ադրբեջանի Հանրապետության 4 գյուղերի հատվածներից: Իսկ այդ հատվածներում սահմանազատումը և դրա արդյունքների իրականացումը երաշխավորո՞ւմ է անվտանգություն։ Չի երաշխավորում անվտանգություն, բայց հարցը հասցեագրելուց հրաժարումը երաշխավորում է անվտանգային սպառնալիքների շարունակաբար մեծացում, և այս բացասական երաշխիքը նախ պետք է վերացնենք»: Այս մասին այսօր՝ ապրիլի 10-ին, Ազգային ժողովում հայտարարել է վարչապետ Նիկոլ Փաշինյանը:

«Իսկ երաշխավորո՞ւմ է, որ ՀՀ տարածքի վրա նոր հարձակում չի լինի։ Չի երաշխավորում։ Բայց հակառակ գործելակերպը երաշխավորում է նոր հարձակում ՀՀ ինքնիշխան տարածքի վրա, և այս բացասական երաշխիքը նախ պետք է վերացնենք։ 

Իսկ երաշխավորո՞ւմ է, որ Ադրբեջանը կպահի սահմանազատումը շարունակելու տրամաբանությունը և կվերադարձնի մեր` ավելի քան 3 տասնյակ գյուղերի կենսական նշանակության տարածքները։ Չի երաշխավորում։ Բայց նշված հատվածում սահմանազատում իրականացնելուց հրաժարվելը երաշխավորում է, որ Ադրբեջանը չի վերադարձնի մեր գյուղերի կենսական նշանակության տարածքները, և այս նեգատիվ երաշխիքը նախ պետք է վերացնենք»,- ավելացրել է  Փաշինյանը։

Քաղտեխնոլոգ Կարեն Քոչարյանը 1or.am-ին ասաց, որ ինքն այստեղ, ոչ մի քաղաքական տեխնոլոգիայի կիրառում չի տեսնում․ «Նիկոլ Փաշինյանը հիմա անելանելի վիճակում է, որովհետև փլվել է իր վերջին 3-4 տարիների հիմնական վեկտորը՝ այդ կեղծ «խաղաղության խաչմերուկը», և ամեն անգամ ինքը մի նոր բան է մոգոնում։ Հայտարարում է, որ երաշխիք չկա։ Ցանկացած երկրի Սահմանադրությունում գրված է, որ երկրի ղեկավարը, նաև այդ երկրի անվտանգության երաշխավորն է։ Եթե այդ մարդը չի կարողանում երաշխավորել, ապա պետք է թողնի գնա»։

Քաղտեխնոլոգը հիշեցնում է՝ ինքն ու իր նման շատ մասնագետներ, դեռ վաղուց նշում էին, որ երկու աթոռի վրա երկար չի կարողանալու խաղալ։ «Այդ խաղը մի օր ավարտվելու էր և հիմա եկել է այդ պահը։ Հնարավոր չէ անընդհատ բոլորին խաբել»,-նշեց Քոչարյանը։

Հարցին, թե ի՞նչ քաղաքական կեցվածք կարող է ընդունել Նիկոլ Փաշինյանը, քաղտեխնոլոգը հակիրճ պատասխանեց․ «Չկա մեկը, որ կարող է կանխատեսել, այդ անձնավորությանը։ Նա վիրավոր գազանի նման անկյուն է քշված` բոլոր գեոքաղաքական կենտրոնների կողմից։ Ընդ որում՝ բոլորը նրանից իրար հակասող բաներ են պահանջում և այդ իրավիճակում, նման մարդուց կանխատեսել որևէ բանական, որևէ օպտիմալ ինչ-որ լուծում՝ անհնար է»։

Այն, որ այս իշխանությունը չի ցանկանում նույնիսկ, նման իրավիճակում հրաժարվել իշխանությունից, կարծես թե ակնհայտ է։ Մասնագետը հարցին հարցով է պատասխանում։ «Իսկ իրեն ո՞վ է հարցնելու։ Ցանկացած քայլ, ցանկացած գեոքաղաքական կենտրոնից հնարավոր է, ցանկացած պահի»,- եզրափակեց Կարեն Քոչարյանը։