ԱԺ նախագահի սայթաքումը. քարտեզ չունեն

Հայաստանի գործող վարչախումբը, ադրբեջանական պահանջներն արդարացնելու իր ջանքերում, երբեմն անցնում է չափը և հայտնվում անհեթեթ իրավիճակում։

Ազգային ժողովի նախագահ Ալեն Սիմոնյանը, երեկ, սոցիալական ցանցերում երկու անգամ խմբագրել է իր իսկ գրառումը՝ նոր քարտեզներ նշելով։ 
«ՀՀ ոչ մի տարածք, ոչ մի բնակավայր, ոչ մի գյուղ, ոչ մի մետր չի կարող հանձնվել , ոչ էլ նման քննարկում կա», տելեգրամյան իր էջում գրել է Ալեն Սիմոնյանը՝ կից հրապարակելով Հայաստանի տարածքն արտացոլող քարտեզ։ Սակայն րոպեներ անց խմբագրել է նույն գրառումը, մեկ այլ քարտեզ տեղադրել, ընդ որում, ի տարբերութուն նախորդի, որպես ադրբեջանական են ուրվագծված Տավուշի և Արարատի մարզերում գտնվող և անկլավային համարվող բնակավայրերը։
«Հայաստանի Հանրապետությունն ունի հստակ քարտեզ, այդ քարտեզով մենք անկախացել ենք և դա քննարկման ենթակա չէ»,- գրել է Սիմոնյանը։
Միևնույն ժամանակ նա որևէ պարզաբանում չի արել, թե ինչու՞ է երկու անգամ փոփոխել իր իսկ դրած քարտեզը, որոնց տարբերությունն առանցքային է։
Մի կողմից գործող իշխանությունն ամեն գնով ցանկանում է կատարել Ադրբեջանի պահանջը` հասկանալով, որ հակառակ դեպքում պատերազմին դիմակայել չի կարողանալու, մյուս կողմից էլ խնդիր ունեն հանրության հետ հաղորդակցվելու, հստակ բացատրելու, ընդհուպ հանրային շերտերի հետ աշխատելու, կամ էլ լավագույնը՝ խոստովանելու սեփական անձեռնհասությունն ու ապիկարությունը և լքելու իշխանությունը՝ այն թողնելով ավելի պատրաստված և հանուն պետության գործող ուժերի։ Փոխարենը փորձում են մանիպուլացիաներով և կեղտոտ քարոզչական հնարքներով հանրությանը համոզել, թե հայկական տարածքները «բուն ադրբեջանական» են։
Ահա հենց սա էլ իրականում այն դավաճանությունն է, որի մասին խոսում է ողջ հանրությունը։

Հայկ Հակոբյան