«Փաշինյանի անբացատրելի տրամաբանությունը փակուղի է տանում. ինչո՞ւ է Հայաստանը հեռանում Ռուսաստանից»
ՎԵՐԼՈՒԾՈՒԹՅՈՒՆՆԵՐ
Հայաստանն ավելի ու ավելի է հեռանում Ռուսաստանից, գրում է mk.ru-ն: Հանրապետության ղեկավարությունը խոսում է արևմտյան երկրների հետ համագործակցության խորացման և նոր դաշնակիցների որոնման անհրաժեշտության մասին։ Վերջերս աշխատանքային այցով երկիր էր ժամանել Հունաստանի պաշտպանության նախարար Նիկոս Դենդիասը։ Նախօրեին էլ Հայաստանի անվտանգության խորհրդի նախագահ Արմեն Գրիգորյանը հայտարարել էր, որ Մոսկվայի հետ Երևանի համագործակցությունը «ռազմավարական սխալ» էր։
Ինչպես mk.ru-ին բացատրել է Minchenko Consulting կապի հոլդինգի նախագահ Եվգենի Մինչենկոն, 2018 թվականի մայիսին իշխանության գալուց անմիջապես հետո է Հայաստանի վարչապետ Նիկոլ Փաշինյանը Ռուսաստանից հեռանալու կուրս ընտրել։ «Խնդիրն այն է, որ Հայաստանի իշխանությունը Ռուսաստանի ղեկավարությունից պահանջում է, որ ավելի շատ սիրեն Հայաստանը, քան Փաշինյանն ու նրա թիմը։ Նրանք հույս ունեին, որ իրենք ոչինչ չեն անելու, քանի որ Մոսկվան ամեն ինչ կանի իրենց համար, և նրանք նույնիսկ ստիպված չեն լինի որևէ բան խնդրել»,- ընդգծել է վերլուծաբանը։
Նրա խոսքով, 2020-ից 2023 թվականներին Հայաստանը պաշտոնապես երբեք օգնություն չի խնդրել ՀԱՊԿ-ից։ «Եղել են որոշ հայտարարություններ, որ Ռուսաստանը պետք է օգներ իրենց, բայց այնպիսի պաշտոնական փաստաթղթեր չկան, որոնք պահանջում էին ներգրավվել այդ հակամարտության մեջ։ Սա նշանակալից պահ է, և նաև Ռուսաստանի հանդեպ անբարյացակամության դրսևորում։ Իհարկե, այս ամենը քիչ է նպաստում երկրների հարաբերությունների բարելավմանը»,- նշել է զրուցակիցը։
Ներկայումս Հայաստանի իշխանությունները փորձում են խորացնել հարաբերությունները արևմտյան երկրների հետ։ Հանրապետության խորհրդարանի խոսնակ Ալեն Սիմոնյանը նույնիսկ հայտարարել է Եվրամիությանն անդամակցության թեկնածուի կարգավիճակ ստանալու երկրի մտադրության մասին։ ՌԴ ԱԳՆ-ն ուշադրություն է հրավիրել Երևանից հնչող հայտարարությունների վրա: «Չգիտես ինչու, Հայաստանում կարծում են, որ պետք է կյանքը կառուցել ոչ թե ամենամոտ հարևանների և ժողովուրդների հետ համագործակցելով՝ պատմականորեն համերաշխ լինելով, այլ նրանց հետ, ովքեր դեմ են ձեր ընկերներին», - ասել է արտգործնախարար Սերգեյ Լավրովը։
Այնուամենայնիվ, Երևանի շրջադարձը դեպի արևմտյան երկրներ չի կարող հաջող լինել, կարծում է Մինչենկոն։ Նա պարզաբանել է, որ ԵՄ երկրները չեն պայքարելու Հայաստանի համար, քանի որ նրանք առնվազն հետաքրքրված են Ադրբեջանի էներգետիկ ռեսուրսներով։ «Փաշինյանի արտաքին քաղաքականությունը կարելի է տարօրինակ անվանել: Եթե ելնում ենք Հայաստանի ազգային շահերից, ապա դա ուղղակի անբացատրելի է»,- եզրափակել է քաղաքագետը։
Նյութը հրապարակման պատրաստեց Կամո Խաչիկյանը
