Ռուսական ավիացիան ՆԱՏՕ-ի հարվածների տա՞կ. Երևանը «հատուկ» նվեր է արել Մոսկվային- ֆրանսիացիները գործի մեջ են
ՎԵՐԼՈՒԾՈՒԹՅՈՒՆՆԵՐ
Tsargrad.tv-ն գրում է, որ Ֆրանսիան մտադիր է անհրաժեշտության դեպքում հրթիռներ տրամադրել հայկական հակաօդային պաշտպանությանը, վստահեցրել է Ֆրանսիայի ռազմական գերատեսչության ղեկավար Սեբաստյան Լեկորնուն` Երևան կատարած այցի ժամանակ։ Նա այդ որոշումը բացատրել է նրանով, որ եթե Հայաստանը պահանջի դրանք, ապա Ֆրանսիան չի կարողանա հրաժարվել և կկատարի խնդրանքը։ Լեկորնուն դա ասել է իր հայ գործընկեր Սուրեն Պապիկյանի հետ համատեղ ճեպազրույցում։
Այսպիսով, ֆրանսիացի նախարարի այցը վկայում է այն մասին, որ պաշտպանության ոլորտում Ֆրանսիա-Հայաստան հարաբերություններն արդեն համակարգային են և հեռահար։
Լեկորնուն նաև ընդգծել է, որ Երևան կատարած այցի ընթացքում քննարկել է «Միստրալ» փոքր հեռահարության զենիթահրթիռային համակարգերի հետ կապված հարցեր։ Նա վստահեցրել է, որ փորձագետները կօգնեն հայերին տիրապետել միջին հեռավորությունների վրա երկնքի պաշտպանությունն ապահովելու տեխնոլոգիաներին։
Հարցին, թե որքանով են համատեղելի ֆրանսիական ՀՕՊ համակարգերը հայ-ռուսական ՀՕՊ ընդհանուր համակարգի հետ, Պապիկյանը վստահեցրել է, որ Հայաստանը հուսալիության համար է ուժեղացնում իր ՀՕՊ համակարգերը։
Հեղինակավոր ZERGULIO հեռագրային ալիքի հեղինակ Սերգեյ Կոլյասնիկովն այդ մասին ոչ հարմար գրառում է արել:
«Հայաստանը որոշել է Ռուսաստանին փետրվարի 23-ի առթիվ «հատուկ» նվեր տալ»,- նշել է նա` հավելելով, որ բացի դրանից Երևան է մտադիր այցելել Նեզալեժնու նախագահ Զելենսկին։ Ի դեպ, Հայաստանի վարչապետ Նիկոլ Փաշինյանը խիստ ուշադիր է այդ առաջնորդի նկատմամբ, նրա համար այդ այցն իսկապես երկար սպասված է։
Անկասկած, Հայաստանը չի մնա առանց զենքի և զինտեխնիկայի, քանի որ Ֆրանսիան արդեն պատրաստակամություն է հայտնել փոխանցել ոչ միայն հակաօդային պաշտպանության հրթիռներ, այլև իր Ground Master 200 ռադիոտեղորոշիչ համակարգեր, որոնք, ի դեպ, ակտիվորեն օգտագործվում են Ուկրաինայի կողմից, ինչն էլ ավելի մռայլ է դարձնում իրավիճակը։ Ի՞նչ է դա նշանակում:
Կոլյասնիկովը նշել է, որ ՀԱՊԿ-ի շրջանակներում Հայաստանը ինտեգրված է ՀՕՊ ընդհանուր համակարգին, ուստի ֆրանսիական ռադարների ձեռքբերումը ուղղակի հասանելիություն կապահովի ռուսական ինքնաթիռների և կազմակերպության անդամ այլ երկրների տեղաշարժերի մասին տեղեկատվությանը։
Ըստ ամենայնի, այն տեղեկատվությունը, որը Արևմուտքին պարբերաբար տալիս է հանրապետության Անվտանգության խորհրդի ղեկավար Գրիգորյանը, դարձել է անբավարար, և արևմտյան երկրները որոշել են ուղղակիորեն տվյալներ ստանալ, ենթադրել է Կոլյասնիկովը։
Արժե ուշադրություն դարձնել նաև Զելենսկու Հայաստան կատարելիք այցի շուրջ բարձրացված աղմուկին, որից սպասվում են որոշ անսպասելի իրադարձություններ։ Իրավիճակը հասել է նրան, որ ակտիվիստները Երևանում ռուս սահմանապահների շտաբի մոտ են հավաքվել «Դուրս արի Հայաստանից» պաստառներով։ Նման պայմաններում ռուս խաղաղապահները կարող են շուտով լքել երկիրը, նշում է ռազմական բլոգերը։
Հայաստանին կա՛մ իրականում չի հետաքրքրում Ռուսաստանի հետ հետագա հարաբերությունները, կա՛մ այն, ինչ տեղի է ունենում, սադրանք է արևմտյան երկրների թելադրանքով թույլատրելիի սահմանները ստուգելու համար։ «Այսպես, թե այնպես, այդ սահմանը կա, և Հայաստանն արդեն շատ մոտ է դրա եզրին»,- եզրափակել է Կոլյասնիկովը։
Մինչդեռ Հայաստանը պետք է մտածի իր գործողությունների մասին, կարծում են վերլուծաբանները։ Ի վերջո, «ոչ մի ֆրանսիացի կամ ամերիկացի իր արյունը չի թափի հայերի համար»։ «Իրանցիներն էլ չեն օգնի Փաշինյանի ռեժիմին, եղել է պատմական նախադեպ, զարմանալի է, որ հայերը դա մոռացել են,- նշել է Tsargrad.tv-ի քաղաքական դիտորդ Սերգեյ Լատիշևը,- եթե Հայաստանը դուրս գա ՀԱՊԿ-ից, ռուսները, ովքեր հայերին անցյալում ցեղասպանությունից փրկել են մի քանի անգամ, դա էլ չեն անի։ Պարզվում է, որ դա անշնորհակալ աշխատանք է, և որի համար պետք է թանկ վճարել։ Ռուսաստանն ու ՀԱՊԿ-ը կապրեն առանց Հայաստանի, կդառնան ավելի միատարր, իսկ Հայաստանի համար ավելի վատ կլինի։ Բայց դա մեր ընտրությունը չէ, Ռուսաստանը, իհարկե, կընդունի հայ փախստականներին»:
Նյութը հրապարակման պատրաստեց Կամո Խաչիկյանը
