«Հալածանք է սկսվել». Երևանի ավագանու անդամը խնդրել է Ռուսաստանին պաշտպանել իրեն Փաշինյանից
ՎԵՐԼՈՒԾՈՒԹՅՈՒՆՆԵՐ
Mk.ru-ն գրում է, որ երկու շաբաթ առաջ սպառնալիքներով և ճնշումներով առևանգումից փրկված «Մայր Հայաստան» դաշինքից Երևանի ավագանու պատգամավոր Նարինե Հայրապետյանը դիմել է Ռուսաստանի իշխանություններին քաղաքական ապաստան ստանալու խնդրանքով։ Նա սոցցանցում հայտարարություն է արել ընդգծելով, որ Հայաստանում իր հետապնդումները շարունակվում են, ինչպես նաև ընդհանրապես Հայաստանի ընդդիմության հալածանքները։
Այն բանից հետո, երբ անցած սեպտեմբերին «Մայր Հայաստան» դաշինքը մասնակցեց հակակառավարական հանրահավաքներին՝ կոչ անելով հեռացնել վարչապետ Նիկոլ Փաշինյանին Լեռնային Ղարաբաղի հանձնման պատճառով, ընդդիմության համար դժվար ժամանակներ եկան։ Նարինե Հայրապետյանի խոսքով իրեն փողոցից առևանգել են հունվարի 15-ին: Անհայտ անձինք նրան նստեցրել են մեքենա, կապել են նրա աչքերը և տարել հեռավոր մի վայր, որտեղ ինչ-որ մեկը նրա հետ խոսել է իր քաղաքական գործունեության մասին։ Զրույցի ընթացքում պահանջ է եղել «մնալ սահմանների մեջ և դադարեցնել կոշտ քննադատությունը»։ Զրույցից հետո Հայրապետյանին նույն կերպ հետ են տարել։ Պատգամավորը դիմել է ոստիկանություն, սակայն դա արդյունք չի տվել, և ինքը ստիպված է եղել հեռանալ Հայաստանից։
«Մի քանի օր նրա հետ կապ չունեինք։ Կապ հաստատելով Հայրապետյանն ասել է, որ ինքը լքել է երկիրը, քանի որ ոստիկանությունը ճնշում է գործադրել իր վրա ստիպելով հրաժարվել ցուցմունքներից և նոր ցուցմունքներ տալ»,- ասվում է Հայրապետյանի գործընկերների հայտարարության մեջ։ Ինչ վերաբերում է Հայաստանի ուժային կառույցներին, ապա նրանք դեպքի վերաբերյալ ունեն իրենց վարկածը։ Ըստ Հայաստանի քննչական կոմիտեի մամուլի քարտուղար Գոռ Աբրահամյանի Հայրապետյանն իրենց ասել է, որ «իրեն ոչ ոք չի առևանգել, և նա առևանգման մասին հայտարարություն է արել քաղաքական դրդապատճառներով»։
«Նիկոլ Փաշինյանը սկսեց հետապնդումները բոլոր այն անհատների և ուժերի նկատմամբ, ովքեր ցանկանում են պահպանել երկիրը, ովքեր չեն ցանկանում թշնամական վերաբերմունք Ռուսաստանի նկատմամբ, ովքեր չեն ցանկանում, որ Սորոսն ու Արևմուտքը կառավարեն Հայաստանը, իսկ ՀՀ-ն դառնա իրենց խամաճիկը։ Փաշինյանն ու իր ուժայինները ոչ միայն Ղարաբաղը ծախեցին, այլ նաև Հայաստանն են ծախում: Հայաստանի Հանրապետության ներսում սկսվել են հալածանքները», - ասում է Հայրապետյանը տեսանյութում։ Կնոջ խոսքով իրեն ճնշումների տակ են ստիպել ցուցմունքներ տալ Հայաստան դաշինքի ղեկավար Անդրանիկ Թևանյանի, ինչպես նաև ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի դեմ։ Այժմ նա Ռուսաստանը համարում է իր համար ամենաապահով վայրը և քաղաքական ապաստան է խնդրել երկրի իշխանություններից։ Քաղաքական ապաստան կտան, թե ոչ՝ հայտնի չէ։ Հայաստանը Եվրասիական տնտեսական համայնքի անդամ է, այսինքն ֆորմալ առումով բարեկամ պետություն, և մինչ այժմ ընդունված չէր նման երկրների քաղաքացիներին քաղաքական ապաստան տրամադրել։ Բայց ամեն ինչ փոխվում է...
«Mk.ru»-ի համար տեղի ունեցածը գնահատել է քաղաքագետ, ՌԴ ԱԳՆ ՄԳԻՄՕ համալսարանի ավագ դասախոս Ալեքսեյ Զուդինը։
«Իհարկե, Փաշինյանի ուղղվածությունը Ռուսաստանից աստիճանական և զգույշ հեռացման ուղղությամբ շարունակվում է։ Եվ դրա արդյունքներից մեկն էլ բռնաճնշումներն են այդ ուղղվածության հակառակորդների նկատմամբ, ինչը տեսնում ենք Նարինե Հայրապետյանի հայտարարության օրինակում»,- ասել է Զուդինը, – քաղաքական ապաստանի խնդրանքով դիմելն այս դեպքում արտառոց բան չէ։ Եվ, իմ կարծիքով, միջպետական հարաբերություններն ինքնին չեն կարող վատթարանալ։ Թե ինչպես Փաշինյանը կօգտագործի այդ փաստը և կուզենա՞ օգտագործել այս հանգամանքը Ռուսաստանի հետ Հայաստանի հարաբերություններին հետագա վնաս հասցնելու համար, այլ հարց է։ Բայց պետք է նշել, որ այս դեպքը պահանջում է բազմակողմանի ու մանրակրկիտ քննություն։ Որովհետև հնարավոր է, որ այս ամենն արվել է զգացմունքային հողի վրա։ Կոնֆլիկտի հանգամանքները առայժմ հայտնի են միայն մի կողմի ներկայացմամբ, և պետք է համոզվել, որ ամեն ինչ իսկապես այնպես է, ինչպես հայտարարել է քաղաքական ապաստանի խնդրանքը ներկայացրած անձը:
Mk.ru. – Եթե Ռուսաստանը ապաստան տա հայ քաղաքական գործիչներին, կարո՞ղ է արդյոք արձագանք լինել Հայաստանի իշխանությունների կողմից քաղաքական ապաստան տրամադրելով մեր ընդդիմադիրներին։
Ալեքսեյ Զուդին.- Հնարավոր է, որ Փաշինյանը նման կերպ արձագանքի: Միջպետական հարաբերություններում սովորական են հայելային միջոցառումները։ Քաղաքական ապաստան տրամադրելու փաստը, եթե դա տեղի ունենա, դժվար թե ցույց տա, որ երկու երկրների հարաբերությունները գտնվում են շատ բարձր մակարդակի վրա։
Նյութը հրապարակման պատրաստեց Կամո Խաչիկյանը
