Ակնկալվում է, որ հնդկական Akash զենիթահրթիռային համակարգի մատակարարումները Հայաստան կսկսվեն մի քանի ամսից. ANI
ՔԱՂԱՔԱԿԱՆՈՒԹՅՈՒՆ
Ակնկալվում է, որ հնդկական Akash զենիթահրթիռային համակարգի մատակարարումները Հայաստան կսկսվեն մի քանի ամսից, հայտնում է հնդկական ANI լրատվամիջոցը՝ հղում անելով երկրի պաշտպանության նախարարության աղբյուրին։
«Սպասվում է, որ Հայաստան մատակարարումները կսկսվեն մի քանի ամսից։ Միևնույն ժամանակ, շատ երկրներ, այդ թվում՝ Բրազիլիան, Եգիպտոսը և Ֆիլիպինները, հետաքրքրություն են ցուցաբերել Akash հրթիռային համակարգի նկատմամբ»,- հնդկական լրատվամիջոցներին ասել է աղբյուրը։
Ավելի վաղ EurAsianTimes պորտալը հայտնել էր, որ Հայաստանը կարող է Հնդկաստանից գնել Akash փոքր հեռահարության զենիթահրթիռային համակարգեր՝ խոցելի տարածքներն ու կետերը օդային հարձակումներից պաշտպանելու համար։
Համալիրը կարող է միաժամանակ մի քանի թիրախներ խոցել խմբային կամ ինքնավար ռեժիմով։ Այն ունի ներկառուցված էլեկտրոնային հակաքայլերի (ECCM) հնարավորություններ: Զենքի ամբողջ համակարգը տեղակայված է շարժական հարթակներում։
Այն կարող է արդյունավետորեն խոցել ուղղաթիռները, կործանիչները և անօդաչու թռչող սարքերը, որոնք թռչում են 4–25 կիլոմետր շառավղով։ Համալիրը լիովին ավտոմատ է և արագ հայտնաբերում է թիրախները և ոչնչացնում դրանք:
Այն բարձր դիմացկունություն ունի ակտիվ և պասիվ միջամտությունների նկատմամբ: Այն կարող է արագ փոխադրվել և նաև արագ տեղակայվել:
Շնորհիվ բազմաթիվ թիրախներ ներգրավելու և մանևրող թիրախներ ոչնչացնելու ունակությամբ, ինչպիսիք են անօդաչու թռչող սարքերը (ԱԹՍ), թեւավոր հրթիռները և ուղղաթիռներից արձակվող հրթիռները, Akash-ն իդեալական կերպով համապատասխանում է Բաքվի մարտական անօդաչու սարքերի դեմ պայքարելու՝ Երևանի կարիքներին:
