ՀԱՊԿ արտգործնախարարները հայտարարություն են ընդունել Եվրասիայի անվտանգության ընդհանուր մոտեցումների վերաբերյալ
ՔԱՂԱՔԱԿԱՆՈՒԹՅՈՒՆ
Բելառուսի արտգործնախարար Սերգեյ Ալեյնիկը հայտարարել է, որ չորեքշաբթի Մինսկում ՀԱՊԿ երկրների արտգործնախարարությունների ղեկավարները հայտարարություն են ընդունել եվրասիական տարածքի անվտանգության ապահովման ընդհանուր մոտեցումների վերաբերյալ։
«Համատեղ հանդիպման արդյունքում հաստատվել և ստորագրվել են մի շարք փաստաթղթեր՝ քաղաքական և ռազմաքաղաքական, ինչպես նաև ժամանակակից մարտահրավերներին ու անվտանգության սպառնալիքներին դիմակայելու բնագավառում։ Մոտ 20 փաստաթուղթ։ Մասնավորապես, ցանկանում եմ նշել երկու կարևոր փաստաթուղթ»,- լրագրողներին ասել է Ալեյնիկը արտգործնախարարների խորհրդի, պաշտպանության նախարարների և ՀԱՊԿ Անվտանգության խորհուրդների քարտուղարների կոմիտեի համատեղ նիստից հետո:
Ըստ նրա, «առաջին փաստաթուղթը ՀԱՊԿ ԱԳ նախարարների հայտարարությունն է եվրասիական տարածքի անվտանգության ապահովման ընդհանուր մոտեցումների վերաբերյալ, ինչը առանձնահատուկ նշանակություն ունի ներկա ռազմաքաղաքական իրավիճակում»։
«Երկրորդ փաստաթուղթը ԱԳ նախարարների խորհրդի և ՀԱՊԿ խորհրդի համատեղ որոշումն է ՀԱՊԿ անդամ երկրների լրացուցիչ միջոցառումների ցանկի վերաբերյալ, որոնք ուղղված են ՀԱՊԿ տեղեկատվական անվտանգության ապահովմանը։ Այս հարցը մեծ նշանակություն է ձեռք բերում վիրտուալ տարածքում աճող մարտահրավերների ու սպառնալիքների համատեքստում»,- ասել է բելառուս նախարարը։
Նա հավելել է, որ հանդիպման մասնակիցները համաձայնեցրել են մի շարք փաստաթղթերի նախագծեր, որոնք ուղղված են կազմակերպության ամրապնդմանը և անդամ երկրների անվտանգության բարձրացմանը։ «Դրանք կառաջարկվեն պետությունների ղեկավարների քննարկմանը Հավաքական անվտանգության խորհրդի նիստում, որը տեղի կունենա վաղը Մինսկում»,- ասել է Ալեյնիկը։
Նա նաև նշել է, որ հանդիպմանը ղազախական կողմը տեղեկատվություն է ներկայացրել 2024 թվականին Ղազախստանի ՀԱՊԿ նախագահության ընթացքում գործունեության առաջնահերթ ոլորտների մասին։
«Մենք, իհարկե, աջակցում ենք և ամեն կերպ կնպաստենք դրանց իրականացմանը։ Ի դեպ, բելառուսական մի շարք առաջնահերթություններ նույնպես ուղղված են երկարաժամկետ հեռանկարին։ Հուսով ենք, որ դա կարտացոլվի հետագա նախագահությունների աշխատանքային ծրագրում»,- ասել է նա՝ հաջողություն մաղթելով Ղազախստանին։
