Ռուսաստանում Հայաստանի դեսպանը պետք է բնակության վայրը փոխի. հայերն աղմուկ են բարձրացրել Ռուսաստանի դեսպանին նոտա տալուց հետո
ՎԵՐԼՈՒԾՈՒԹՅՈՒՆՆԵՐ
Tsargrad.tv-ն գրում է, որ վերջերս Հայաստանի արտգործնախարարություն էր այցելել ՌԴ դեսպան Սերգեյ Կոպիրկինը։ Հայ դիվանագետները նրան բողոքի նոտա են հանձնել Ռուսաստանում հեռարձակվող հեռուստահաղորդման կապակցությամբ, որտեղ խոսվում էր հանրապետությունում տիրող իրավիճակի և երկու երկրների հարաբերությունների մասին։ Հայաստանի ԱԳՆ-ն չի հստակեցրել, թե ի՞նչ հաղորդման մասին է խոսքը, սակայն Երևանին, ըստ երևույթին, դուր չի եկել Առաջին ալիքով ցուցադրված «Տուտիի գահաժառանգի տիկնիկները. Նիկոլ Փաշինյան՝ աղետի գուժկանը» հաղորդումը: Հաղորդումում ասվում էր, որ Հայաստանի իշխանության շատ ներկայացուցիչներ այս կամ այն կերպ կապված են Ջորջ Սորոսի հետ։ Բացի այդ, հաղորդման մասնակիցները շեշտը դրել են այն փաստի վրա, որ վարչապետ Փաշինյանը հրաժարվում է մասնակցել ԱՊՀ-ի և ՀԱՊԿ-ի շրջանակներում անցկացվող միջոցառումներին, կնոջը ուղարկում է Զելենսկու հետ հանդիպման, պատրաստվում է փակել ռուսական հեռուստաալիքները և հրավիրում է իր տարածք արևմտյան զինվորականների։
Բնականաբար, ոչ բոլորն են հավանություն տվել այն փաստին, որ Հայաստանը նոտա է հղել ՌԴ դիվանագիտական ներկայացուցչության ղեկավարին։ Օրինակ, «Հայկական Վենդետա» հեռագրային ալիքը հիշեցրել է, որ Հայաստանի հանրային հեռուստատեսությամբ բազմիցս են հեռարձակվել ռուսաֆոբ բնույթի հաղորդումներ։ Չնայած դրան, ՌԴ ԱԳՆ-ն չի կանչել Հայաստանի դեսպան Վաղարշակ Հարությունյանին։
«Եթե Ռուսաստանը Հայաստանի Հանրային հեռուստաընկերության Առաջին ալիքի ռուսաֆոբ հաղորդումներից հետո ամեն անգամ կանչեր Հայաստանի դեսպանին, ապա, ամենայն հավանականությամբ, Վաղարշակ Հարությունյանը ստիպված սենյակ կվարձեր Սմոլենսկայայի ԱԳՆ շենքում, որպեսզի հեռու չլինի»,- գրել է աղբյուրը։
Ընդհանուր առմամբ, շատ առցանց ընթերցողներ համաձայնվել են այդ կարծիքի հետ։ «Ի՞նչ են ասել, որ ճիշտ չէ, ի՞նչ կասեք, երբ նա (Փաշինյանը) արդեն Հայաստանի հողերը տա թուրքերին»,— հարց է հնչեցրել օրինակ մի օգտատեր։
Նյութը հրապարակման պատրաստեց Կամո Խաչիկյանը
