Վարդանյան. ՌԴ-ն կարող էր օգնել, հասարակության մեջ շատ ուժեղ բացասական տրամադրվածություն կա
ՀԱՍԱՐԱԿՈՒԹՅՈՒՆ
Ռուսաստանըշատ է սիրում իր համար խնդիրներ ստեղծել, հետո արիաբար դրանք հաղթահարել։ Ես չեմ հասկանում, թե ով ինչ որոշումներ է կայացրել և ինչու։ Դա թող մնա այս կամ այն որոշումը կայացրածների խղճին։ Այս մասին ռուս լրագրող Քսենյա Սոբչակին տված հարցազրույցում ասել է Արցախի նախկին պետնախարար Ռուբեն Վարդանյանը։
«Ռուսաստանը, իհարկե, կարող էր օգնել։ Մարդիկ ընդհանրապես շատ են վրդովված, որ ռուս խաղաղապահները չկարողացան կանգնեցնել այս հակամարտությունը։ Հասարակության մեջ շատ ուժեղ բացասական տրամադրվածություն կա համաշխարհային հանրության, այդ թվում՝ Ռուսաստանի հանդեպ»,- նշել է նա։
Վարդանյանը հավելել է, որ առաջին հերթին չի օգնել Հայաստանը, որը անվտանգության երաշխավորն էր։
«Չի օգնել Արևմուտքը, որը լիովին հանգիստ է վերաբերվում այն փաստին, որ բռնապետական ռեժիմը կարող է իրեն թույլ տալ անել այն, ինչ ուզում է և ոչնչացնում է մարդկանց: Արդարադատության միջազգային դատարանի և այլ կազմակերպությունների որոշումները հանգիստ անտեսվեցին, և ամենատարրական մարդասիրական և իրավական նորմերը խախտող անձի նկատմամբ պատժամիջոցներ չկիրառվեցին»,- ընդգծել է նա։
Վարդանյանն ասել է, որ իր փորձը՝ համախմբել մարդկանց միասնական ուժի՝ դրան դիմակայելու համար, լուրջ հակազդեցություն է առաջացրել ինչպես Ադրբեջանի ղեկավարության, այնպես էլ այստեղի որոշ ուժերի կողմից:
«Այս առումով, երբ ես պետնախարար էի, ֆանտաստիկ ճնշում կար Ադրբեջանից, Թուրքիայից և, ինչպես հասկանում եմ, Հայաստանից։ Իմ գնալուց հետո վիճակը միայն վատացավ»,- եզրափակել է նախկին պաշտոնյան։
