Իրանցի փորձագետ. Սյունիքի կորուստը հայոց պետականության կործանման ճանապարհն է
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ Իրանցի վերլուծաբան Էրֆան Լաջևարդին ասել է, որ Ադրբեջանի և Թուրքիայի կողմից Սյունիքով անցնող միջանցքը «ճեղքելը» Հայաստանի կործանման ճանապարհն է։ Այս մասին հայտնում է Iranist-ը։
Էրֆան Լաջևարդին նշել է. «Զանգեզուրի միջանցքի ստեղծման հարցում Հայաստանի և Իրանի թույլ դիրքորոշումը կթուլացնի Հայաստանի ազդեցությունը երկրի հարավում և փաստացի կհանգեցնի նրա փլուզմանը։ Առանց Սյունիքի մարզի Հայաստանը կորցնում է ազատ ջրերի հասանելիությունն ու աշխարհագրական արժեքը»։
Ըստ նրա. «Այս ճգնաժամից ելքը ոչ թե ՆԱՏՕ-ի մուտքն է տարածաշրջան, ոչ թե անպտուղ բանակցությունները, որոնք չեն հանգեցնի երկարաժամկետ խաղաղության, այլ Իրանի մուտքը, որը մինչ այժմ դիտորդի դիրք է գրավել քաղաքական ասպարեզում որպես տարածաշրջանի առանցքային խաղացողներից մեկը»։
Վերլուծաբանը նաև հավելել է. «Իրանը բազմիցս է ցույց տվել իր հզորությունն ու լուրջ դերը Մերձավոր Արևելքում խաղաղության և կայունության հասնելու գործում` միջամտելով շատ ավելի լուրջ ճգնաժամերի` ինչպիսիք են հակամարտությունները Սիրիայում, Եմենում, Լիբանանում և Իրաքում։ Իրանը, օգտագործելով Սաուդյան Արաբիայի վրա ունեցած իր լծակները, կարողացավ ոչ միայն դադարեցնել պատերազմը Եմենում, այլ նաև Եմենի հետ խաղաղության հասնելու համար ստիպել Սաուդյան Արաբիայի կառավարությանը գնալ լայն զիջումների»:
EADaily-ն հիշեցնում է, որ վերջին օրերին Հարավային Կովկասում լարվածությունը զգալիորեն աճել է: Ադրբեջանը և Թուրքիան ձգտում են Հայաստանի տարածքով արտատարածքային միջանցքի հասնել, որը կմիացնի Անկարան և Բաքուն, ինչպես նաև հնարավորություն կտա Թուրքիային մուտք գործել Կենտրոնական Ասիայի երկրներ: Իրանը բազմիցս հայտարարել է, որ չի ընդունի տարածաշրջանում սահմանների փոփոխությունները: Հայաստանի հետ սահմանը Թեհրանի միակ ելքն է դեպի Եվրոպա, որը չի գտնվում Անկարայի և Բաքվի վերահսկողության տակ, որոնց հետ Իսլամական Հանրապետությունը բարդ հարաբերություններ ունի։
Նյութը հրապարակման պատրաստեց Կամո Խաչիկյանը
