«Ես 45 տարեկան եմ և իմ ամբողջ քաղաքական կենսագրությունը դրել եմ այս ընտրությունների սեղանին». Մանե Թանդիլյան

«Ապրելու երկիր» կուսակցության նախագահ Մանե Թանդիլյանն այսօր Երեւանի ավագանու ընտրությունների քարոզարշավի մեկնարկին հայտարարեց. «Երեւանի ավագանու ընտրությունները երբեք այսքան քաղաքական չեն եղել, որքան այս անգամ է: Երբեք այսքան համահայկական չեն եղել»:

Նա հորդորեց երեւանցիներին անպայման գնալ ընտրությունների. «Ես 45 տարեկան եմ եւ իմ ամբողջ քաղաքական կենսագրությունը դրել եմ այս ընտրությունների այս սեղանին, որովհետեւ համոզված եմ, թե որքան ճակատագրական է դա, նվիրում ու ջանք չենք խնայելու մեր սիրելի երեւանցիներին բացատրելու դա: Ես պատրաստ եմ իմ կյանքի հաջորդ 10 տարիներին նվիրել իմ երկրին անմնացորդ: Այսպես է միայն հնարավոր փոխել ապագան, այլ կերպ երազանքը չիրականացված պաթոսի կվերածվի, իսկ մենք գիտենք երազանքն ինչպես իրականության վերածենք»: Նա ասաց, որ ծանր բեռ է գնալ դռնից դուռ, բակից բակ, բացատրել հանրությանը, թե ինչու է այսքան կարեւոր այս ընտրությունը, ինչպես է Երեւանում ընտրություններով փոփոխություն բերած նոր իշխանությունը բեկելու այս սրընթաց քանդվող ընթացքը, ինչպես է արտաքին ազդակ գնալու Երեւանից, որ մենք համաձայն չենք այն քաղաքականության հետ, որը որդեգրել են այսօրվա իշխանությունները. «Պատասխանատվությունը մեծ է քաղաքական ընթացքը փոխելու»:

Հռիփսիմե ՋԵԲԵՋՅԱՆ