Վահեն զոհվեց՝ բաց տարածքում տանկով կռիվ տալով
ՀԱՍԱՐԱԿՈՒԹՅՈՒՆՀրազդանի զինվորական պանթեոնում ամեն շաբաթ օրը օդը խնկաբույր է, շիրմաքարերից մի քանիսին՝ թարմ ծաղիկներ: Պանթեոնը շատերի համար է սրբավայր, 2016-ի ապրիլից հետո նաեւ Հրազդանցի Զաքարյանների համար: Նրանց միակ որդին Վահեն այդ օրերին հերոսացած տղաներից է:
Աշխատանքը ծնողներին դեռ տարիներ առաջ էր ստիպել թողնել Հրազդանը ու տեղափոխվել Ռուսաստան: Վահեն երկու քույրերի հետ որոշել էր մնալ: 13-ամյա Վահեն օտար միջավայրին միայն 7 ամիս էր կարողացել դիմանալ, վերադառնալու որոշման հետ ծնողներն այնքան էլ համաձայն չեն եղել, բայց Վահեին ետ պահել չէր ստացվել:
9-ը տարեկանից Վահեն սպորտով էր զբաղվում, հաջողությունների պակաս չուներ: Դպրոցն ավարտելուց հետո, որոշել էր հենց այս ուղղությամբ էլ կրթությունը շարունակել:
«Ընդունվել էլ ֆիզկուլտուրային ինստիտուտ ու ինքը հոկտեմբերի 14-ին տեսավ էտ թուղթը, ամսի 16-ին գնաց բանակ»,- պատմում է մայրը:
Ծնողներն ասում են ծառայությունը հետաձգելու հնարավորություն ուներ, առանց երկար մտածելու հրաժարվել էր: «Պիտի մրցումների գնար հրաժարվեց»:
Ծառայությունից տանկիստ Վահեն գոհ էր: Այն ,որ իրավիճակը սահմանին լարված է, ծնողները հեռուստացույցով էին լսել, Մոսկվայից շտապել էին Հայասատան, Վահեն մինչ այդ հանգսատացրել էր ինքն ուսումնավարժանքի է մասնակցում:
«Ապրիլի 4-ին եկանք ու ճանապարհին իմացանք էտ դեպքն է եղել»:
Հետո պիտի իմանային, որ ներկայացրած ուսումնասվարժանքը իրականում հատուկ գործողությունն է եղել, ու իր մյուս ընկերների հետ Վահեն 7 րոպե բաց տարածքում հակառակորդի հետ տանկով կռիվ է տվել: Վահեի հայրն ասում է՝ շատ զինվորականներ վստահեցրել են, թեեւ տղաների տանկը հակառակորդը կարողացել է խոցել , բայց իրենց արածը հերոսություն է:
Զաքարյանների տանն ամենուր որդու պարգեւներն են: Միշտ սպորտային հաղթանակներով է տուն վերադարձել , ծառայության ընթացքում էլ աչքի ընկել որպես լավ տանկիստ: Ծառայությունը ժամանակից շուտ է ավարտել , բայց պարգեւներ դեռ շարունակում է ստանալ:
Վահեի զոհվելուց հետո բակում, որտեղ մի ժամանակ մանկական խաղեր է խաղացել, դպրոցում որտեղ սովորել է ՝ ամեն տեղ Վահեն իր ներկայությունն ունի: Ծնողներն ասում են 13 տարեկան էր, երբ որոշեց Մոսկվայի հանգիստ կյանքը թողնել ու Հայաստան վերադառնալ: Այն, որ մայրն ու հայրը իր օրինակին չէին հետեւել, երիտասարդի սրտով չի եղել, ծառայության ընթացքում չէր ստացվել, բայց նախորդ տարվա ապրիլին Վահեն հերոսանալով մեկընդմիշտ ծնողներին ստիպել է Հայրենիք վերադառնալ:
