Կարմիր խաչի ճանապարհը փակելով՝ Ադրբեջանը նախապատրաստվում է մաքսակետի բացման․ Դավիթ Բաբայան

Ադրբեջանի պահվածքը հետեւանքն է միջազգային հանրության ամորֆ եւ անատամ քաղաքականության։ Այս մասին NEWS.am-ի հետ զրույցում ասաց Արցախի նախագահի խորհրդական Դավիթ Բաբայանը։

«Գազամատակարարման վերականգնման ժամանակ կային մարդիկ, որոնք ուրախացան, բայց մենք պետք է գիտակցենք՝ ում հետ գործ ունենք եւ նման պարագայում ավելի զգույշ լինենք, որովհետեւ իրենք հենց այնպես ոչինչ չեն անում։ Սա կտտանքի ձեւ է։ Այլ բացատրություն գոյություն չունի։ Իսկ Կարմիր խաչի մուտքի արգելքն ուղղակի պատրվարկ է, քաղաքականություն, որ հետո մաքսակետ տեղադրեն կամ կտտանքի մի ձեւ, բայց սա հետեւանքն է այն բանի, որ ի դեմս միջազգային հանրության մենք ունենք ամորֆ հասկացություն։ Իրենք որեւէ քայլ չեն ձեռնարկում այս սանձարձակ պահվածքը կանխելու համար»,- նշեց Բաբայանը։

Բաբայանի խոսքով՝ Ադրբեջանից սպասելի է ամեն ինչ։ Իրենք ձգտում են գաղութացնել Արցախը։ Ժամանակն է եկել անկեղծ զրուցելու մի շարք երկրների հետ, եւ պետք է ունենալ Հայաստանի վերջնական դիրքորոշումը։

«Ամեն ինչի կարիքն ունենք, բայց ամենաշատը հայ ժողովրդի հոգատարության։ Արդեն որոշ լրատվամիջոցներում ԼՂ տերմինն է գործարծվում է, ինչը սարսափելի է, բայց մենք պետք է հայ ժողովրդի տեսակետը վերջնական իմանանք, գուցե՝ իրենք են այդպես ուզում։ Ռուսաստանն էլ պետք է հստակ դիրքորոշում հայտնի։ Այդ չարաբաստիկ պայմանագրում կա՞ կետ, որով Ադրբեջանը անցակետ պետք է դնի, եթե ոչ՝ ապա Ռուսաստանը պետք է կատարի իր պարտավորությունները։ Այս հարցը պետք է Կրեմլի մակարդակով լուծվի, դրա համար ենք մենք դիմում ՌԴ նախագահին»,- ընդգծեց նա։