Բաքվում Իրանի նախկին դեսպան. Իսրայելը սադրում է Ադրբեջանին և Հայաստանին
ՎԵՐԼՈՒԾՈՒԹՅՈՒՆՆԵՐ
Rossaprimavera.ru-ն գրում է, որ Իսրայելը գաղտնի և անուղղակի խրախուսում է Բաքվին բացասական դեր խաղալ տարածաշրջանում և լարվածություն է հրահրում Ադրբեջանի և Հայաստանի միջև։ Այդ մասին մարտի 28-ին Entekab առցանց հրատարակությանը տված հարցազրույցում ասել է Ադրբեջանում Իրանի նախկին դեսպան Մոհսեն Փաքայնը։
Նրա խոսքով, Ադրբեջանին զենք վաճառելով «սիոնիստական ռեժիմը» գաղտնի համագործակցում է նաև Հայաստանի հետ։ Փաքայնը հավելել է, որ Թել Ավիվի նպատակն է տարածաշրջանում իր ազդեցությունը պահպանելու համար երկարաձգել պատերազմը Կովկասում։
Պատասխանելով Իրանի և Ադրբեջանի միջև պատերազմի հավանականության մասին հարցին նա ասել է, որ հիմնական հակամարտությունը Ադրբեջանի և Հայաստանի միջև է, իսկ Իրանը Ռուսաստանի հետ Բաքվի և Երևանի միջև լարվածությունը թուլացնելու նպատակով խաղում է միայն միջնորդի դեր։ Նրա խոսքով, Թեհրանը տեսնում է նոր պատերազմների սպառնալիք և հնարավոր սցենարներ դեպի Կովկաս ոչ տարածաշրջանային երկրների էքսպանսիայի համար։ Փաքայնը զգուշացրել է, որ եթե Ադրբեջանը փորձի ուժով գրավել Զանգզուրի միջանցքը, ապա հավանական է, որ ԱՄՆ-ը միջամտի այդ գործընթացին։
Նա նշել է, որ միջանցքը հայկական հողի մի մասն է, սակայն դա չի նշվել Մոսկվայի խաղաղության պայմանագրում, որով ավարտվել է 2020 թվականին Հայաստանի և Ադրբեջանի միջև հակամարտությունը։ Փաքայնը հավելել է, որ դա է Բաքվին հիմք տալիս պահանջներ ներկայացնել Զանգզուրի հարցով։ Նա հիշեցրել է, որ Ադրբեջանի նկատմամբ Ռուսաստանի վերջին դիրքորոշումը զսպող գործոն է, քանի որ Մոսկվայի համաձայնագրի հիման վրա Ռուսաստանը վերահսկում է Ադրբեջանի և Հայաստանի միջև հրադադարի ռեժիմը։
Նյութը հրապարակման պատրաստեց Կամո Խաչիկյանը
