31-ը լավ նշան չէ. Hraparak.am

Euronews-ի «Брюссель, моя любовь?» ռուսերեն հաղորդման մասնակիցները հրճվանքով արձանագրեցին, որ ՆԱՏՕ-ն այլեւս 31 անդամ ունի, եւ գովեստի խոսքեր շռայլեցին Թուրքիային՝ Ֆինլանդիայի անդամագրվելուն կողմ լինելու համար: Նաեւ հույս հայտնեցին, որ Թուրքիան եւ Հունգարիան չեն խոչընդոտի Շվեդիայի անդամագրվելուն: Հաղորդման մասնակիցներից մեկն էլ հիշեց խորհրդային-ֆիննական պատերազմը, եւ այդպիսի իրադարձությունները կանխելու համար էլ հենց, իբր, Ֆինլանդիան անդամագրվեց ռազմական դաշինքին: 

Այո, Շվեդիայի անդամագրվելը հույժ կարեւոր է, որովհետեւ 31 թիվը կարող է կանխորոշել ՆԱՏՕ-ի ոչ այնքան լուսավոր ապագան: Ահա թե ինչու: «31-րդ բաժնի մահը» («Гибель 31-го отдела») էստոնացի ռեժիսոր Պիտեր Ուրբլայի՝ երկու մասից բաղկացած գունավոր գեղարվեստական խորհրդային հեռուստատեսային ֆիլմ է, որը նկարահանվել է 1980 թվականին՝ Tallinnfilm ստուդիայի կողմից, ԽՍՀՄ պետական հեռուստառադիոհեռարձակման կոմիտեի պատվերով։ Ֆիլմի սցենարը գրվել է շվեդ գրող Պեր Վալոյի՝ «Սպանություն՝ 31-րդ հարկում» (1964 թ.) հակուտոպիա-վեպի հիման վրա։ Կա նաեւ վեպի ավելի վաղ՝ խորհրդային էկրանավորումը (3 դրվագով հեռուստատեսային պիես «31-րդ բաժին», 1972)։

Սյուժե. ինչ-որ երկրում խոշոր մեդիա-կոնցեռնի ղեկավարությունը, որը գործնականում մենաշնորհ է հաստատել ԶԼՄ-ների նկատմամբ, ստանում է անանուն նամակ, ենթադրաբար` ահաբեկիչներից, որում ասվում է, որ կոնցեռնի գլխավոր շենքում՝ Մամուլի տանը, ռումբ է տեղադրված, որը շուտով կպայթի: Կոնցեռնի ղեկավարությունը դիմում է ոստիկանություն: Ոստիկանության տեսուչ Յենսենը ղեկավարում է 30 հարկանի շենքի տարհանումը… Պայթյուն տեղի չի ունենում, սակայն կոնցեռնն ունենում է ֆինանսական մեծ կորուստներ: …Ոստիկանության պետը Յենսենին հանձնարարում է՝ կարճ ժամկետում անցկացնել հետաքննություն: Նա սկսում է հետաքննությունը, սակայն նկատում է, որ իրեն հետեւում են: Բացի դրանից, Յենսենին սպառնում են ռադիոկապով, նա ենթարկվում է հարձակման: Նա զարմանքով իմանում է, որ կոնցեռնում գոյություն ունի հատուկ գաղտնի բաժին, որ գտնվում է կողմնակի աչքերից քողարկված շենքի 31-րդ հարկում… ինչո՞վ է զբաղվում այդ բաժինը՝ անհայտ է, դրա գոյության մասին տեղյակ են ոչ մեծ թվով մարդիկ: Կոնցեռնի ղեկավարության հրամանով արգելված է այդ բաժնի ծառայողների տարհանումը, չնայած պայթյունի սպառնալիքին…

Ինչեւէ: Ֆինլանդիայի ղեկավարությունը գիտակցո՞ւմ է, արդյոք, որ սպառնալիքի դեպքում ոչ ոք չի կարողանալու երկրին օգտակար լինել: Բացի դրանից, Ուկրաինայում ՌԴ հատուկ ռազմական գործողությունը, ըստ պաշտոնական հաղորդագրությունների, պայմանավորված է եղել նրանով, որ Արեւմուտքը խախտել է ջենթլմենական պայմանավորվածությունը՝ ՆԱՏՕ-ի չընդլայնվելու առնչությամբ: Եթե Ռուսաստանը մտադրություն ունենար ներխուժել Ֆինլանդիա, ապա դա կաներ նախքան այդ երկրի անդամագրվելը ՆԱՏՕ-ին: Բայց, այնուամենայնիվ, եթե այդպիսի պլան եղել է, դա արդեն այլ բան է: Այդ դեպքում ՆԱՏՕ-ն պետք է հետամուտ լինի ՌԴ-ն ոչնչացնելու՝ Զելենսկու հայտարարության իրագործմանը: Ուկրաինան այլ հարց է, եւ այնտեղ չդադարող ողբերգական իրադարձությունները միայն Արեւմուտքի սադրանքի հետեւանքն են, ինչի մասին շատ է ասվել ու ասվում:

Euronews-ի «Брюссель, моя любовь?» նշված հաղորդումից տպավորություն է ստեղծվում, թե ՆԱՏՕ-ին Շվեդիայի եւ Ֆինլանդիայի անդամագրմամբ հաղորդման անվանումը կփոխվի` հարցականն ավելորդ է. «Брюссель, моя любовь!»: Ավելին, զարմանք առաջացրեց այդ հաղորդման ժամանակ հնչած Ֆինլանդիայի նախագահի խոսքը, թե իբր հիմա Ֆինլանդիան երջանիկ կյանքով կապրի: Էլ ո՞ւր, եթե համաշխարհային աստիճանակարգում մինչ այդ էլ Ֆինլանդիան համարվում էր ամենաերջանիկ երկիրն աշխարհում: Թվում է, թե այսուհետ այդպես չի լինի…
Իմ «մտահոգությունը» 31 թիվն է: Կարծում եմ` աշխարհի բոլոր երկրները պետք է միավորվեն ու հորդորեն Թուրքիային եւ Հունգարիային, որպեսզի նրանք արագացնեն Շվեդիայի անդամագրումը ՆԱՏՕ-ին, որ ստացվի ոչ թե 31, այլ՝ 32: Սա արդեն այլ բան կնշանակի` 32 ատամ ցույց կտան աշխարհին:

ՀԳ. Մեծամասշտաբ ցեղասպանություններ իրագործած եւ իրագործող Թուրքիան ՆԱՏՕ-ի հեղինակավոր, ազդեցիկ անդամն է: ՆԱՏՕ-ն նրա «ձեռքը չբռնեց», երբ նա Արցախում իրականացրեց, աջակցեց եւ շարունակում է աջակցել հայերի հերթական ցեղասպանությանը: ՆԱՏՕ-ն Թուրքիային չի սաստում, երբ թուրքերը Հայաստանն են ասպատակում, իսկ Արցախի Հանրապետության քաղաքացիներին «սրի եւ սովի» միջոցով նվաստացնում, դանդաղ ու դաժան բնաջնջման են տանում:

Աղբյուրը՝ Hraparak.am