Երևանը քայլ արեց դեպի Անկարա. ինչպե՞ս կպատասխանի Թուրքիան Հայաստանի կողմից մեկնած բարեկամության ձեռքին
ՎԵՐԼՈՒԾՈՒԹՅՈՒՆՆԵՐ
eadaily.com-ը գրում է, որ գնդակը Թուրքիայի կողմն է, Հայաստանն արել է իր քայլը: Այդ կարծիքին է Սթենֆորդի համալսարանի (Կալիֆորնիա) պրոֆեսոր Արթուր Խաչիկյանը, ով մեկնաբանել է Անկարայի և Երևանի միջև հարաբերությունների կարգավորման գործընթացի վերջին զարգացումները:
Հայաստանը ճիշտ քայլ կատարեց օգնության ձեռք մեկնելով ավերիչ երկրաշարժից տուժած Թուրքիային։ Այժմ Անկարան պետք է ցույց տա, թե ինչպես կարձագանքի Երևանի պաշտոնական քայլերին։ Եթե նրանք իսկապես ցանկանում են դիվանագիտական քայլեր ձեռնարկել, ապա կարող են առաջին հերթին ճնշում գործադրել Ադրբեջանի վրա, կարծիք է հայտնել քաղաքագետը։
«Թող ցույց տան, թե որքան մարդասեր են և իրականում ինչպես են ուզում մեզ եղբայրների պես վարվել։ Արցախում մեր հայրենակիցներն արդեն երրորդ ամիսն է շրջափակման մեջ են... Լավ կլիներ, որ այդ ուղղությամբ ինչ-որ քայլեր լինեն, կամ Բաքվի հայ գերիները ազատ արձակվեն»,- ասել է Խաչիկյանը։
Նրա խոսքով, այն թե ինչպես կարձագանքեն թուրքական իշխանությունները, կախված է այդ երկրի ներքին քաղաքականությունից, «բայց նրանք դժվար թե փոխեն իրենց քաղաքականությունը Հայաստանի նկատմամբ»։
«Իմ կարծիքով հնարավոր են որոշ զիջումներ, հնարավոր են որոշ ժեստեր, բայց չեմ կարծում, որ նրանք կհրաժարվեն Զանգեզուրի միջանցքից (ցամաքային կապ Ադրբեջանի արևմտյան շրջանների և Նախիջևանի միջև Հայաստանի տարածքով) , և չեմ կարծում, որ նրանք կհրաժարվեն հայկական Սյունիքի նկատմամբ իրենց հավակնություններից։ Իմ կարծիքով, Թուրքիան ավելի շատ է հետաքրքրված Զանգեզուրի միջանցքով, քանի որ նրանք ստեղծում են իրենց նախագիծը՝ Թուրանը։ Երկու տարի հետո նրանց զինված ուժերը կդառնան մեկ բանակ, Թուրքիան և Ադրբեջանը կունենան մեկ բանակ։ Այսինքն կա Ադրբեջանի և Թուրքիայի խորը ինտեգրացիա, և դրա համար առաջին հերթին պետք է Սյունիքը, որպեսզի նրանք կարողանան առանց խնդիրների ինտեգրվել։ Այսինքն, ցավոք, աշխարհագրությունը չի փոխվում մարդասիրությամբ։ Հիմա թող ցույց տան, թե ուր է հասնելու իրենց մարդասիրությունը»,- ասել է նա:
Խոսելով Հայաստանի և Թուրքիայի միջև սահմանի բացման հնարավորության մասին Խաչիկյանը մատնանշել է, որ Անկարան կարող է մի շարք նախապայմաններ առաջադրել այդ քայլին դիմելու համար։ Օրինակ պնդել Հայաստանի և Ադրբեջանի կողմից խաղաղության պայմանագրի նախնական կնքման հարցում։
Նյութը հրապարակման պատրաստեց Կամո Խաչիկյանը
