Լեռնային Ղարաբաղը լիակատար շրջափակման մեջ է հայտնվել՝ առանց սննդի և գազի
ՎԵՐԼՈՒԾՈՒԹՅՈՒՆՆԵՐ
Mk.ru–ն գրում է, որ Լեռնային Ղարաբաղը, փաստացի հայտնվել է հարկադիր շրջափակման մեջ։ Ադրբեջանցի «էկոակտիվիստները» փակել են հանրապետությունը Հայաստանի հետ կապող Լաչինի միջանցքը, իսկ Բաքուն դադարեցրել է գազամատակարարումը Ստեփանակերտ։ Ղարաբաղի հետ միասին ռուսական խաղաղապահ զորախումբն է հայտնվել ծանր վիճակում.
Ադրբեջանցի այսպես կոչված բնապահպան ակտիվիստները, որոնց թվում կան աջ արմատական պանթուրքիստական Bozkurt կազմակերպության կողմնակիցները, որոնք հանկարծ մտահոգվել են բնապահպանական խնդիրներով, շարունակում են շրջափակել Ղարաբաղը Հայաստանի հետ կապող Ստեփանակերտ-Գորիս մայրուղին։ Միջանցքի փակումը հանգեցրել է Շուշայի շրջանի Մեծ Շեն, Խին Շեն, Եղցաոհ և Լիսագոր գյուղերի շրջափակմանը, որտեղ սննդամթերք և առաջին անհրաժեշտության ապրանքներ այլևս չեն մատակարարվում։
Քանի որ մայրուղին գտնվում է ռուսական խաղաղապահ կոնտինգենտի պատասխանատվության գոտում, մեր զինվորականները հայտնվել են սալի ու մուրճի արանքում։
Ադրբեջանը մի կողմից Ռուսաստանից պահանջում է իր մասնագետներին թույլ տալ մտնել Ղարաբաղի հանքավայրերի տարածք, որտեղ նրանց մտնել թույլ չեն տալիս տեղացիները։ Մյուս կողմից, Ստեփանակերտը ԼՂՀ հրամանատարությանն է դիմել ճանապարհը փակելու անթույլատրելիության մասին խոսքերով, որը կարող է հանգեցնել «հումանիտար աղետի»։ Տրանսպորտային միջանցքի խնդիրը դեկտեմբերի 12-ին դարձել է ՌԴ նախագահ Վլադիմիր Պուտինի և Հայաստանի վարչապետ Նիկոլ Փաշինյանի զրույցի թեման։
ԱՄՆ-ն ու Ֆրանսիան արդեն կոչ են արել դադարեցնել շրջափակումը, սակայն Բաքվում նրանց ձայնը լսելի չի եղել։ Էլ ի՞նչ կարելի է ասել այն սահմանափակ միջոցների մասին, որոնք կարող են ձեռնարկել խաղաղապահները։ Ադրբեջանական կողմը նաև պարբերաբար քննադատում է ռուս զինվորականներին իրենց կոչերին իբր «արհամարհական վերաբերմունքի» համար։
Ինչ վերաբերում է տարածաշրջանի գազային շրջափակմանը, որի պատճառով անորոշ ժամանակով փակվել են ուսումնական հաստատությունները Լեռնային Ղարաբաղում, ապա Ադրբեջանը առաջին անգամ չէ, որ նման բան է անում: Ներկայումս 120 հազար բնակիչ մնացել է առանց գազի: Հայկական կողմը նշել է, որ տեղի ունեցածը ադրբեջանցի զինվորականների կանխամտածված գործողություն է։
ՌԴ ԱԳՆ ՄԳԻՄՕ-ի ավագ դասախոս Ալեքսեյ Զուդինը կարծում է, որ հակամարտությունը տարածաշրջանում, որն առաջին հայացքից սկսել էր մարել, իրականում պարբերաբար սրվում է, որը խոսում է այն մասին, որ կողմերը գոհ չեն բաց բախումների ժամանակ ձեռք բերված արդյունքներից և կարգավորման գործընթացից։
«Իրադարձությունների զարգացման հեռանկարները մեծապես կախված են նրանից, թե որքան ինքնավար է ադրբեջանական կողմն իր գործողություններում։ Ամբողջովին պարզ չէ, թե արդյո՞ք Ադրբեջանն է սրացման իրական նախաձեռնողը, թե՞ դրա հետևում կանգնած է Թուրքիան»,- նշել է փորձագետը։
Զուդինը MK-ին ասել է նաև, որ եթե Ադրբեջանը գործում է անկախ, ապա Ռուսաստանի համար ավելի հեշտ կլինի։ «Հակառակ դեպքում ռուսական ջանքերը կբախվեն լրացուցիչ դժվարությունների։ Թուրքիայի բովանդակային ներգրավվածությունը կնշանակի, որ կարգավորումը բավականին ջանքեր կպահանջի։ Եթե Թուրքիան ներգրավված է սրման մեջ, ապա մեծ հավանականությամբ կարելի է ենթադրել, որ դա այն ընդհանուր խաղի մի մասն է, որն անընդհատ խաղում է Էրդողանը»,– եզրափակել է Զուդինը։
Նյութը հրապարակման պատրաստեց Կամո Խաչիկյանը
