Քաղաքագետ. Զատուլինի մուտքի արգելքը հակասում է հայկական շահերին
ՎԵՐԼՈՒԾՈՒԹՅՈՒՆՆԵՐ
regnum.ru-ն գրում է, որ Ռուսաստանի Պետդումայի պատգամավոր Կոնստանտին Զատուլինի մուտքը երկիր արգելելու մասին Հայաստանի իշխանությունների որոշումը չի արտացոլում հայ հասարակության և ժողովրդի շահերը։ Այդ մասին REGNUM-ի թղթակցին ասել է քաղաքագետ, «Ժողովրդի ձայնը» (Հայաստան) փորձագիտական ակումբի անդամ Արման Ղուկասյանը։
«Զատուլինը այն քաղաքական գործիչն է, որը տասնամյակներ շարունակ պաշտպանել է հայկական շահերը՝ ասելով բաներ, որոնք դուր չեն եկել Հայաստանի իշխանություններին, դրա համար էլ նրանք այդպես են վարվել։ Նրանք միշտ պատրաստ են զոհաբերել պետական շահերը հանուն սեփական շահերի։ Նույն կերպ Մարգարիտա Սիմոնյանը երբեք չի խոսել ի պաշտպանություն Հայաստանի գործող իշխանության, ինչի պատճառով էլ նա ևս անցանկալի հյուր է դարձել Հայաստանում, թեև հայուհի է։ Այս իշխանությունները դա անում են բոլոր այլախոհների հետ, թեև ձևացնում են, թե իրենք են ժողովրդավարության չափանիշները։ Անմիջապես ուզում եմ ասել, որ այս որոշումը չի արտացոլում հայ հասարակության և ժողովրդի վերաբերմունքը։ Վստահ եմ, որ Հայաստանում իշխանափոխությունից հետո Զատուլինը կրկին սպասված ու հարգված մարդ կլինի մեր երկրում»,- ասել է փորձագետը։
Հիշեցնենք, որ հոկտեմբերի 25-ին Հայաստանի իշխանությունները հայտարարել են, որ Կոնստանտին Զատուլինի մուտքը Հայաստան «անցանկալի է»։ Նման որոշում է կայացվել նաև RT հեռուստաալիքի գլխավոր խմբագիր Մարգարիտա Սիմոնյանի նկատմամբ։
Նյութը հրապարակման պատրաստեց Կամո Խաչիկյանը
