Հայաստանը մտադիր է զգալիորեն ավելացնել ռազմական ծախսերը
ՔԱՂԱՔԱԿԱՆՈՒԹՅՈՒՆ
Inosmi.ru-ն գրում է, որ Ադրբեջանի կողմից շարունակվող ռազմական ճնշման ֆոնին Հայաստանը հայտարարել է, որ կավելացնի պաշտպանական ծախսերը գրեթե 50 տոկոսով։
Կառավարության նիստում կառավարության ներկայացրած բյուջեի նախագծով ռազմական ծախսերը կկազմեն 501 մլրդ դրամ (ավելի քան 1,2 մլրդ դոլար)։ Դա դրամային արտահայտությամբ 47 տոկոսով ավելի է 2022 թվականի համեմատ, իսկ դոլարային արտահայտությամբ ավելին, քանի որ վերջին մի քանի ամիսների ընթացքում հայկական արժույթը կտրուկ արժևորվել է։ Օրինագիծը չի հստակեցնում, թե կոնկրետ ինչի համար են ուղղվելու լրացուցիչ միջոցները, սակայն ասվում է, որ բյուջեն կծախսվի առաջնահերթությունների վրա, ներառյալ «մարտական մեքենաները, սարքավորումները, կապի համակարգերը, զենքի և զինամթերքի հնարավոր ներքին գնումները»:
Հայաստանի կառավարությունը գտնվում է հանրության կողմից ահռելի ճնշման տակ 2020 թվականի պատերազմում Ադրբեջանից կրած պարտությունից հետո զինված ուժերը զգալիորեն ուժեղացնելու և երկիրը վերազինելու համար։ Այդ ժամանակվանից Երևանը անշեղորեն ավելացրել է պաշտպանական ծախսերը 2020 թվականի 669 միլիոն դոլարից 2021 թվականին հասնելով 678 միլիոնի, իսկ 2022 թվականին 754 միլիոն դոլարի։ Մինչդեռ Ադրբեջանը հայտարարել է, որ նախատեսում է մինչև 2025 թվականն ավելացնել իր ռազմական ծախսերը մինչև 2,8 միլիարդ դոլար՝ 2020 թվականի 2,2 միլիարդ դոլարի և 2022 թվականի 2,6 միլիարդ դոլարի դիմաց:
Հայաստանում ռազմական գնումների հետ կապված իրավիճակը վատթարացել է այն բանից հետո, երբ այս տարվա սկզբին Ռուսաստանը հատուկ գործողություն է սկսել Ուկրաինայում։ Արդյունքում, ըստ երևույթին, ընդհատվել է այն զենքի մատակարարումը Ռուսաստանի Դաշնությունից, որը փաստացի պետք է իրականացվեր Հայաստան մատակարարելու մենաշնորհով։
Կառավարության նիստում վարչապետ Նիկոլ Փաշինյանը նշել է «դաշնակիցների» կողմից զենքի մատակարարման ընդհատումների մասին, ինչի համար մեղադրել է Ադրբեջանին։
«Որտեղ հնարավոր է, նրանք [Ադրբեջանը] փորձում են կանխել Հայաստանին զենք-զինամթերքի մատակարարումը,- ասել է նա,- կան դեպքեր, երբ հարյուր միլիոնավոր դոլարների վճարումներ են կատարվել, բայց գործընկեր երկրները չեն կատարում իրենց պարտավորությունները»։ «Փաշինյանն ասում է, որ Հայաստանը սպասում է զենքի, որի համար միլիոններ է վճարել։ Միակ դաշնակիցը, երբ խոսքը հարյուր միլիոնավոր դոլարների մեծ գնումների մասին է, Ռուսաստանն է», - պարզաբանել է Երևանի վերլուծական կենտրոնի գիտաշխատող, ռազմական վերլուծաբան Լեոնիդ Ներսիսյանը։
Այս ամսվա սկզբին Ադրբեջանը աննախադեպ հարձակումներ է իրականացրել Հայաստանի տարածքի վրա։ Երկօրյա կատաղի մարտերի արդյունքում Երևանը հայտնել է 207 զոհված կամ անհետ կորած զինվորների, ինչպես նաև չորս զոհված և երկու անհետ կորած խաղաղ բնակիչների մասին։ Բաքուն հայտնել է 80 սպանված զինվորի մասին։
Սեպտեմբերի 28-ին Հայաստանը հայտնել է, որ ադրբեջանական գնդակոծության հետևանքով ևս երեք զինվոր է մահացել։ Բացի այդ, Ադրբեջանը սպառնում է հետագա հարձակումներով՝ փորձելով դիվանագիտական առավելություն ստանալ խաղաղ համաձայնագրի շուրջ ընթացող բանակցություններում։
Նյութը հրապարակման պատրաստեց Կամո Խաչիկյանը
