Հայտնաբերվել են Երևանում 3 երեխաների վրաերթի ենթարկած վարորդն ու նրա ռուսական համարանիշներով Toyota-ն
ՀԱՍԱՐԱԿՈՒԹՅՈՒՆ
Ոստիկանության Աարաբկիրի բաժնի քրեական հետախուզության և համայնքային ոստիկանության բաժանմունքների ծառայողները, ձեռնարկելով անհրաժեշտ օպերատիվ-հետախուզական միջոցառումներ, հայտնաբերել են սեպտեմբերի 9-ին Երևանում 3 երեխաների վրաերթի ենթարկած վարորդին և նրա վարած ավտոմեքենան:
Ինչպես հայտնում է Shamshyan.com-ը, այդ օրը՝ ժամը 22:30–ի սահմաններում անհայտ մակնիշի և համարանիշի ավտոմեքենան Նաիրի Զարյան փողոցի 72 հասցեի դիմաց վրաերթի էր ենթարկել Երևանի բնակիչներ, 15-ամյա Սարգիս Ա.-ին, 10-ամյա Ինեսա Հ.-ին, 19-ամյա Էլսիդա Հ.-ին:
Վրաերթից հետո վարորդը, նրանց թողնելով անօգնական, հեռացել էր դեպքի վայրից, իսկ վրաերթի ենթարկվածները տեղափոխվել էին «Սուրբ Աստվածամայր» բժշկական կենտրոն, որտեղ շնորհիվ բժիշկների՝ հնարավոր է եղել փրկել նրանց կյանքը:
Նույն օրը դեպքի վայր էին ժամանել ՀՀ ոստիկանության պարեկային ծառայության Երևանի գնդի պարեկները և Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի խումբը՝ քննիչ Գևորգ Դանիելյանի գլխավորությամբ:
Մինչ քննչական խումբն աշխատում էր դեպքի վայրում, ոստիկանության Արաբկիրի բաժնի պետ Երվանդ Նիկոյանը օպերատիվ տեղեկություններ է ստանում, որ վրաերթը կատարվել է Toyota Camry մակնիշի ռուսական համարանիշներով ավտոմեքենայի կողմից: Ու արդեն ժամերի ընթացքում Արաբկիրի ոստիկանները պարզում են վարորդի ինքնությունը ու բացատրական աշխատանքների արդյունքում վարորդը՝ Երևանի բնակիչ, 34-ամյա Է. Բ.-ն, ինքնակամ ներկայանում է քննչական բաժին:
Ավտոմեքենան քննիչի հանձնարարականով տեղափոխվում է ոստիկանության պարեկային ծառայության Երևանի գնդի պահպանվող հատուկ տարածք:
