«Արևելք-2022». ՌԴ զինվորականները հետ են մղել հրթիռային հարվածը
ՄԻՋԱԶԳԱՅԻՆ
ՌԴ Արևելյան ռազմական օկրուգի ՀՕՊ ստորաբաժանումները «Արևելք-2022» ռազմավարական զորավարժությունների ընթացքում հետ են մղել պայմանական հակառակորդի զանգվածային հրթիռային հարվածը։ Տեղեկությունը հայտնում է Ռուսաստանի պաշտպանության նախարարությունը:
«Արևելյան ռազմական օկրուգի հակաօդային պաշտպանության (ՀՕՊ) ստորաբաժանումները կատարել են զանգվածային հրթիռային հարվածը հետ մղելու առաջադրանքը՝ պայմանական հակառակորդի կողմից բարձր ճշգրտության զենքի, ավիացիայի և ռադիոէլեկտրոնային պայքարի միջոցների կիրառման պայմաններում։ Զորավարժությունն անցկացվել է Բուրիաթիայի Հանրապետության «Տելեմբա» զորավարժարանում»,- ասված է հաղորդագրության մեջ:
Նշվում է, որ Ս-300ՊՍ հաշվարկների զինծառայողները հայտնաբերել են թռչող սարքերը, ճանաչել են թիրախները, դրանք ոչնչացնելու որոշում են կայացրել և հրթիռներ են արձակել։
«Արևելք-2022» ռազմավարական զորավարժություններն անցկացվում են սեպտեմբերի 1-7-ը ՌԴ Արևելյան ռազմական օկրուգի յոթ զորավարժարանում։ Վարժանքներին մասնակցում է ավելի քան 50 հազար մարդ, ավելի քան 5 հազար միավոր սպառազինություն և ռազմական տեխնիկա, այդ թվում՝ 140 թռչող սարք, 60 մարտական նավ, ռազմանավակներ և ապահովման նավեր:
ՌԴ ԶՈւ-ից զորավարժություններին կմասնակցեն ռազմական կառավարման մարմինները և Արևելյան ռազմական օկրուգի զորքերը, օդադեսանտային զորքերի, հեռավոր և ռազմատրանսպորտային ավիացիայի ուժերի մի մասը:
Համատեղ գործողություններ կմշակեն ՀԱՊԿ-ի, ՇՀԿ-ի և այլ գործընկեր երկրների՝ Ադրբեջանի, Ալժիրի, Հայաստանի, Բելառուսի, Հնդկաստանի, Ղազախստանի, Ղրղզստանի, Չինաստանի, Լաոսի, Մոնղոլիայի, Նիկարագուայի, Սիրիայի և Տաջիկստանի օպերատիվ կառավարման խմբերը, զորակազմերն ու դիտորդները:
