ՌԴ ԶՈւ-ն ոչնչացրել է Ուկրաինայի` ԱՄՆ-ից ստացած հակամարտկոցային համալիրը․ ՌԴ ՊՆ
ՄԻՋԱԶԳԱՅԻՆ
Ռուսական օպերատիվ-մարտավարական և բանակային ավիացիան, ինչպես նաև հրետանին և հրթիռային զորքերը խոցել են ուկրաինական զորքերի կառավարման 8 կետ, ոչնչացրել 6 պահեստ, Ս-300 ռադիոլոկացիոն կայան, «Բուկ-Մ1» արձակման կայանք և մեկ ամերիկյան հակամարտկոցային պայքարի համալիր։ Այս մասին հայտնում է Ռուսաստանի պաշտպանական գերատեսչությունը։
Նշվում է, որ ոչնչացվել են նաև հրթիռահրետանային սպառազինության և զինամթերքի վեց պահեստ՝ Խարկովի մարզի Պերվոմայսկի բնակավայրի, Խերսոնի մարզի Նովոալեքսանդրովկա, Դնեպրոպետրովսկի մարզի Զելենոդոլսկ, ԴԺՀ-ի Զվանովկա, Սլավյանսկ և Չերկասսկոյե բնակավայրերի մոտակայքում։
Բացի այդ, ՌԴ ԶՈւ-ն անցած օրվա ընթացքում հետ է մղել ուկրաինական «Գրադ» համազարկային հրթիռային համակարգերի երկու դասակ, «Հիացինտ-Բ» հրանոթների երեք դասակ, ինչպես նաև Դ-30 հաուբիցների երկու դասակ:
Պաշտպանական գերատեսչությունից հայտնում են նաև, որ ռուսական ՀՕՊ միջոցներն օդում ոչնչացրել են HIMARS-ի ութ ռեակտիվ արկ՝ Խերսոնի մարզի Կախովկայի շրջանում:
Նշվում է նաև, որ ՌԴ ԶՈւ-ն Զապորոժիեի և Նիկոլաևի շրջաններում ոչնչացրել է մոտ 80 զինծառայողի:
«Ռուսաստանի օդատիեզերական ուժերի բարձր ճշգրտության զենքով Զապորոժիեի մարզի Պոլտավկա բնակավայրի շրջանում խոցվել է տարածքային պաշտպանության 102-րդ բրիգադի կառավարման կետը: Ոչնչացվել է մինչև 30 ազգայնական և 14 միավոր ռազմական տեխնիկա»,- ասել են գերատեսչությունում։
ՌԴ ՊՆ-ից հայտնել են նաև, որ Նիկոլաևսկի մարզի Լուպարևո բնակավայրի շրջանում 28-րդ մեքենայացված բրիգադի մարտական դիրքերի ուղղությամբ կենտրոնացված կրակային հարվածի հետևանքով ոչնչացվել են ավելի քան 50 ազգայնականներ, ինչպես նաև յոթ միավոր զրահատանկային և հատուկ ավտոմոբիլային տեխնիկա:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 178-րդ օրը։
