Հարցը տալիս նման պատասխան չէի ակնկալում. Մետաքսե Հակոբյան

Արցախի խորհրդարանում երեկ ընդդիմադիր «Արդարություն» խմբակցության պատգամավոր Մետաքսե Հակոբյանը, դիմելով ԱՀ նախագահ Արայիկ Հարությունյանին, ասաց, որ ըստ նոյեմբերի 9-ի հայտարարության, Լաչինի միջանցքով երեք տարվա ընթացքում պետք է նախագծվեր այլընտրանքային ճանապարհի պլանը՝ համաձայնեցնելով կողմերի հետ: Պատգամավորի դիտարկմամբ՝ ներկայումս կառուցվում է ճանապարհ, որը Լաչինի միջանցքի երկայնքով է և դուրս է 5 կիլոմետր լայնություն, որի հետևանքով էլ ի հայտ է եկել Բերձոր, Աղավնո և Սուս համայնքների հայաթափման հարցը:

«Մենք որևէ մեկին չենք ասել՝ դուրս եկեք Բերձորից։ Սուս գյուղում մենք այսօր համարյա բնակիչ չունենք, նաև, որքան գիտեմ, սոցիալական ծրագրերի շրջանակներում, Բերձորի և Սուսի բնակիչները ստացել են իրենց համապատասխան փոխհատուցումները: Անկախ ամեն ինչից՝ մենք Բերձորը պետք է շրջանցենք: Բերձորում մեր հայրենակիցների հետագայում ապրելու հնարավորությունը շատ քիչ եմ համարում, Աղավնոյում շարունակելու ենք մեր պայքարը»,- ասաց Հարությունյանը:

Հակոբյանի խոսքով՝ երբ հարցը տալիս էր, չէր ակնկալում նման պատասխան և ընդհանրապես պատկերացում չուներ՝ ինչ պատասխան է տրվելու.

«Հատկապես վերջին ժամանակաշրջանում մեզ բոլորիս էր անհանգստացնում հարցը, քանի որ Արցախում խառնաշփոթ էր առաջացել, և պարզաբանումների կարիք իսկապես կար: Այսպես կոչված առցանց ասուլիսի ժամանակ, երբ Նիկոլ Փաշինյանը շատ հանգիստ տոնով շատ դաժան բաներ ասաց, բավականին շատ բացահայտումներ արեց, որտեղ շատ կարևոր էր իր այն դիրքորոշումը, որ այն, ինչ ԼՂԻՄ-ի սահմաններում չէ, պետք է հանձնվի Ադրբեջանին: Այդտեղ ևս շատերի մոտ հարցեր առաջացան՝ ինչպես եղավ, որ Հադրութն ու Շուշին հանձնվեցին, եթե ամեն ինչ այդ տրամաբանությամբ էր: Տպավորությունն այնպիսին է, որ ինքը կա՛մ տեղյակ չէ՝ ինչի տակ է ստորագրել, կա՛մ հետո ընդհանրապես չէր անդրադարձել կետերին՝ մասնավորապես 6-րդ կետին: Բնականաբար, այլ տարբերակ չկար, քան հարցադրումներ անել Արցախի նախագահին՝ հասկանալու համար՝ ինչ է կատարվում, բայց, ցավոք սրտի, հարցադրումներն ավելի շատ հարցեր առաջ բերեցին և մեծացրեցին անհանգստությունը:

Արցախի նախագահի խոսքից պարզ դարձավ, որ այն ամենը, ինչ կատարվում է, 6-րդ կետի տրամաբանությունից դուրս է: Նա իր խոսքում անընդհատ խոսում էր ճանապարհի, այլ ոչ թե միջանցքի կառուցման մասին, դրանք տարբեր բաներ են, միջանցքը իրավական կարգավորումներ ունի, ճանապարհը՝ ոչ: Ստացվում է, որ իրականում Հայաստանի իշխանություններն իրենց ձեռքերը լվացել են, առաջինը դրան պետք է ուշադրություն դարձնենք, որովհետև Հարությունյանն ասաց, որ առաջարկներ է ստացել ՌԴ-ի և Ադրբեջանի կողմից, որոնք մերժել է՝ ընտրելով լավագույն տարբերակը: Հետաքրքիր է՝ ինչպիսի՞ն են եղել վատագույն առաջարկները: Եթե պարզվի, որ կառուցելուց հետո այդ ճանապարհն անվտանգ չէ և որակապես չի համապատասխանում մեր պահանջներին, ինչպիսի՞ն են լինելու իշխանությունների քայլերը: 

Շատ տարակուսելի էր նաև Հարությունյանի այն հայտարարությունը, թե պետք է Բերձորից դուրս գանք, հետո էլ ասաց՝ որևէ մեկին չենք ասել՝ դուրս եկեք: Սա ինչ-որ տեղ հույս է տալիս, որ դուրս գալու մասին դեռևս խոսք չկա: Բերձորում էլ կյանքը բնականոն է, ես քիչ առաջ անցնում էի այնտեղով, ամեն ինչ նորմալ է, անհանգստություն չկա այդ առումով, ռուս խաղաղապահներն էլ իրենց գործառույթները բարձր որակով են կատարում:  Քանի որ ՀՀ վարչապետը փաստեց, որ ինքը բացարձակապես չի զբաղվում գոնե Աղավնոյի հարցով, իսկ Արցախի նախագահն ասաց, որ բանակցում է Աղավնոյի համար, հարց է առաջանում՝ ում հետ: Ես հույս ունեմ, որ ՌԴ-ի հետ են այդ բանակցությունները կամ գոնե միջնորդությամբ»,- 1or.am-ի հետ զրույցում ասաց Հակոբյանը: 

Պատգամավորի խոսքով՝ ի տարբերություն Հայաստանի իշխանությունների, Արցախի իշխանությունները և նախագահը չեն խորշում և վստահաբար հայտարարում են, որ Արցախը չի կարող լինել Ադրբեջանի կազմում.

«Թող տպավորություն չստեղծվի, թե մենք այստեղ ամեն ինչին կողմ ենք, ինչ ասում են Արցախի իշխանությունները և նախագահը: Մենք ոչ մի պահ չենք մոռանում, որ իրենք պարտված իշխանություն են, որը մեծ խնդիր է: Բայց մյուս կողմից պետք է չմոռանանք, որ ապրիլի 14-ին մենք մի հարցի շուրջ կոնսենսուսի ենք եկել, և դրանք Արցախի կարմիր գծերն են: Ընդդիմության գործն էլ վերահսկելն է բոլոր գործառույթները, որոնք անում են իշխանությունները: Եթե որևէ խնդիր առաջանա, մենք ցանկացած դեպքում դեմ ենք գնալու, փորձելու ենք գոնե տեղեկացված լինել: 

Ուղղակի մենք փաստեցինք մեզ համար, որ 6-րդ կետի շրջանակներում չէ այն ամենը, ինչ կատարվում է հիմա, և այն ինչ հիմա կառուցվում է, որևէ աղերս չունի այն միջանցքի հետ, որը պետք է կառուցվեր 3 տարվա ընթացում: Գոնե այս իրավիճակում մենք պետք է զգոն լինենք և թույլ չտանք՝ մեզ հրամցնեն այլ բան: Ամեն դեպքում՝ մեր ուշադրության կենտրոնում են և՛ Աղավնոն, և՛ Բերձորը, և՛ Սուսը, կապերը սերտ են, մարդկանց հետ շփումներն անընդհատ կան, և կարևորն այն է, որ այնտեղ որևէ մեկը չի պատրաստվում լքել գյուղը, ընդհակառակը, ես տեղյակ եմ, որ մեր հայրենակիցներից վերադարձել են և գյուղում ապրելու պատրաստակամություն հայտնել»:

Մարիամ Նալբանդյան