«Հայկական վենդետա». Հայաստանի իշխանությունները եթեր են տրամադրում ռուսաֆոբներին
ՄԻՋԱԶԳԱՅԻՆ
Rossaprimavera.ru-ն գրում է, որ Հայաստանում հակառուսական ակցիաներ են տեղի ունեցել, և ըստ ամենայնի, երկրի իշխանությունների անուղղակի մասնակցությամբ: Այդ մասին գրել է «Հայկական Վենդետա» հանրահայտ հեռագրային ալիքը։
«Երկրի գլխավոր ռուսաֆոբը՝ Արման Բաբաջանյանը, հրավիրվել է հանրային (ըստ էության պետական) հեռուստատեսության առաջին ալիքի փրայմ թայմ,- նշել է հրատարակությունը,- արդյունքում Հանրային ալիքի ողջ լսարանը ամբողջ երեկո լսել է մեղադրանքներ Ռուսաստանի հասցեին առ այն, որ նա, ի դեմս Լավրովի և Պուտինի, չի դադարեցրել Արցախում 44-օրյա պատերազմը, խրախուսել է Ադրբեջանին մուտք գործել Հայաստանի տարածք 2021 թվականին Սև լճի շրջանում, ադրբեջանցիներին թույլ է տվել գրավել Փարուխն ու Քարագլուխը, իսկ հետագա սրացումը կասեցվել է ԱՄՆ-ի պետքարտուղար Բլինկենի կողմից»։
Հեռագրային ալիքը նշել է, որ Բաբաջանյանից մեկ օր առաջ էլ վարչապետ Փաշինյանն էր այցելել Հանրային հեռուստաընկերություն, «ամենայն հավանականությամբ, որ անձամբ պատվիրի հեռուստատեսային օրակարգը»։
Այդ ամենի տրամաբանական շարունակությունն էր «Ազգային դեմոկրատական բևեռ» արմատական ռուսաֆոբ կուսակցության երթը Երևանով, որի ժամանակ Վլադիմիր Պուտինի և Սերգեյ Լավրովի հասցեին անպարկեշտ հայհոյանքներ են հնչեցվել, նշել է «Հայկական վենդետան»։ Հեռագրային ալիքը նաև նշել է, որ այս անգամ Հայաստանի ռուսամետ քաղաքացիները չեն գնացել հակաերթի, քանի որ «Հայաստանում ռուսամետ ակտիվիստները բանտարկված են անկապ պատրվակներով, և, ըստ էության, նրանց պաշտպանող չկա»։
Հրապարակման հեղինակները նշել են, որ ի տարբերություն Ռուսաստանի, ԱՄՆ-ը չէր լռի, եթե ամերիկամետ ուժերը իշխանությունների ճնշումներին ենթարկվի։ «Պատկերացրեք, թե ինչ կաներ նույն Լին Թրեյսին (Հայաստանում ԱՄՆ-ի դեսպանը), եթե Հայաստանում ոստիկանությունը մեկ ժամով ձերբակալեր Սորոսի ակտիվիստներից գոնե մեկին»,- ամփոփվել է հրատարակությունը։
Հիշեցնենք, որ հունիսի 9-ին եռօրյա պաշտոնական այցով Երևան էր ժամանել ՌԴ ԱԳ նախարար Սերգեյ Լավրովը։ Նույն օրը Երևանում տեղի էր ունեցել «Ազգային դեմոկրատական բևեռի» երթը, որտեղ ակցիայի մասնակիցները անպարկեշտ հայհոյանքներ էին հնչեցրել Ռուսաստանի ղեկավարության հասցեին։ Չնայած երկրի իշխանությունների կողմից ավելի վաղ ընդունված ծանր վիրավորանքները քրեականացնելու մասին օրենքին, ցուցարարներից ոչ ոք չի կալանավորվել։
Ապրիլի վերջից Հայաստանում բողոքի ցույցեր են տեղի ունենում, իսկ պահանջը երկրի վարչապետի և կառավարության հրաժարականն է Լեռնային Ղարաբաղի նկատմամբ վարվող քաղաքականության պատճառով։ Բողոքի ակցիաները կազմակերպում են ընդդիմադիր կուսակցությունները, որոնք ավանդաբար հանդես են գալիս Ռուսաստանի հետ բարեկամական հարաբերությունների օգտին։ Ոստիկանությունը ամեն օր բերման է ենթարկում մինչև մի քանի հարյուր խաղաղ ցուցարարների։
Նյութը հրապարակման պատրաստեց Կամո Խաչիկյանը
