Իրանցի փորձագետ. Ադրբեջանի կողմից օկուպացված տարածքները վերածվել են հակաիրանական հենակետի
ՄԻՋԱԶԳԱՅԻՆ
Infoteka24.ru-ն գրում է, որ հանրահայտ Irdiplomacy վերլուծական կայքը հարցազրույց է վերցրել իրանցի քաղաքագետ, Եվրասիական հետազոտությունների կենտրոնի եվրասիական հարցերով փորձագետ Շուայբ Բախմանից Ադրբեջանի և Թուրքիայի հակաիրանական քաղաքականության թեմայով։
Պատասխանելով Շուշիի «Աշխարհի ադրբեջանցիների կոնգրեսի» և այդ միջոցառմանը հակաիրանական տարրերի մասնակցության մասին հարցին Բախմանը նշել է, որ իրադարձություններին ժամանակագրորեն նայելով ակնհայտ է դառնում, որ Ադրբեջանը երբեք էլ չի շեղվել իր հակաիրանական քաղաքականությունից: Նա ընդգծել է, որ այդ գործընթացը սկսվում է իրանական մշակույթին ու լեզվին հակադրվելուց և հասնում է պատմության խեղաթյուրմանը և արտաքին քաղաքականության մեջ հակաիրանական գծի ընդգրկմանը։ «Այդ նվաստացուցիչ, վիրավորական և հակաիրանական մոտեցումը Ադրբեջանում հատկապես ակտիվացել է վերջին տարիներին»,- ասել է Բահմանը։
Փորձագետն ընդգծել է, որ Բաքվի հակաիրանական քաղաքականությունը մարտավարական քայլ չէ, այլ ռազմավարական գործընթաց, որը չի սահմանափակվում միայն Ադրբեջանով։ Նրա խոսքով, Ադրբեջանը չի կարող ընդհատել այդ գործընթացը, քանի որ ամեն ինչ նախապես ծրագրված է, և գործընթացին մասնակցում են Թուրքիան, Մեծ Բրիտանիան և Իսրայելը։ Բահմանն ընդգծել է, որ բազմիցս զգուշացումներ են եղել, որ 44-օրյա պատերազմի արդյունքում Ադրբեջանի կողմից օկուպացված տարածքները հարթակ են դառնալու հակաիրանական գործողությունների և Իրանի անվտանգությանը սպառնացող սպառնալիքների համար։ Նա հավելել է, որ խոսքը ոչ միայն «Ադրբեջանցիների կոնգրեսի» մասին է, այլ նաև այն մասին, որ Ադրբեջանի կողմից օկուպացված տարածքները դարձել են իսրայելական ցատկահարթակ Իրանի դեմ հետախուզական և ահաբեկչական գործողությունների համար, այնտեղ՝ Իրանի սահմանի մոտ, պանթուրքիստ անջատողականները ապահով ապաստարան են գտել իրենց գործունեության համար։ Փորձագետն ընդգծել է, որ եթե Ռուսաստանը չկարողանա հեշտությամբ դուրս գալ Ուկրաինայի պատերազմից, ապա նրա ուշադրությունը Հարավային Կովկասի նկատմամբ կթուլանա, ինչը Ադրբեջանի և Թուրքիայի համար բացառիկ հնարավորություն կստեղծի իրականացնելու իրենց ծրագրերը Ղարաբաղում, մասնավորապես Հայաստանով անցնող «միջանցք» ճեղքելու իրենց ծրագրերը։
Բահմանը վստահություն է հայտնել, որ պանթյուրքիստական հոսանքները չեն կարող դիտվել որպես լուրջ սպառնալիք Իրանի տարածքային ամբողջականության համար, քանի որ դրանք Իրանի ներսում ոչ լուրջ գործողությունների կարողություն ունեն, ոչ էլ լայն հասարակական աջակցություն։ Միաժամանակ նա ընդգծել է, որ այն փաստը, որ Ադրբեջանը և Թուրքիան ֆինանսական, քաղաքական և դիվանագիտական աջակցություն են ցուցաբերում այդ շարժումներին, հրավիրում են պաշտոնական համաժողովների, պետք է քննադատվի Իրանի կողմից, քանի որ դա բարիդրացիական դրսևորում չէ և կապված է Իրանի անվտանգության հետ։ Բահմանը նաև ափսոսանք է հայտնել, որ պանթյուրքական հոսանքներին, այնուամենայնիվ, հաջողվել է որոշակի ազդեցություն ստեղծել Իրանի ներքին կառույցներում։
Նյութը հրապարակման պատրաստեց Կամո Խաչիկյանը
