Ղարաբաղյան փակուղի. ազդանշանների սխալ մեկնաբանումը հղի է սրացման վտանգով
ՀԱՍԱՐԱԿՈՒԹՅՈՒՆ
eadaily.com-ը գրում է, որ Ադրբեջանը սխալ է մեկնաբանում Հայաստանից եկող ազդանշանները, և դրա արդյունքը կարող է լինել տարածաշրջանում իրավիճակի նոր սրումը։ Երևանում կայացած մամուլի ասուլիսում նման կարծիք է հայտնել քաղաքագետ Տիգրան Գրիգորյանը։
Նրա խոսքով, Բրյուսելյան բանակցությունների նախօրեին Հայաստանի դիրքորոշումը բավականին մշուշոտ է, և, հաշվի առնելով Ադրբեջանին ուղարկված ազդանշանները, կարելի է ենթադրել, որ հայկական կողմը պատրաստ է հրաժարվել ղարաբաղյան հիմնախնդրի կարգավորման իր սկզբնական պահանջներից: Բայց մյուս կողմից, պետք է հաշվի առնել այն, որ Բաքուն ներկայումս պատրաստ չէ նույնիսկ իր սահմաններում քննարկել ԼՂ կարգավիճակի հարցը։
«Կարծում եմ մշակութային ինքնավարության կարգավիճակը նրանց առավելագույնն է,- նշել է հայ փորձագետը,- հայկական կողմի համար անընդունելի է Լեռնային Ղարաբաղի մշակութային ինքնավարության քննարկումը, քանի որ դա չի լուծում չճանաչված հանրապետության բնակիչների անվտանգության երաշխավորման հարցը։ Նման պայմաններում ղարաբաղյան կարգավորման գործընթացի առաջընթացն ապահովելու համար կողմերից մեկը պետք է հետ քայլ կատարի իր դիրքորոշման մեջ»:
«Այդ քայլը պետք է լինի Ղարաբաղի մասին խոսելը դադարեցնելով։ Ավելին, ինչպես տեսնում ենք, Բաքվի կողմից ներկայացված առաջարկներում այդ մասին խոսք չկա, և առաջ է քաշվում հետպատերազմյան թեզը, թե «հակամարտությունը լուծված է»։ Արցախի կարգավիճակի ցանկացած քննարկում նույնիսկ Ադրբեջանի սահմաններում, Բաքվի համար շեղում կդառնա այդ թեզից։ Ներկա պայմաններում դա քիչ հավանական է, քանի որ Ադրբեջանը խոսում է ուժի դիրքերից և ձգտում է իր դիրքորոշումը պարտադրել Երևանին։ Հայաստանն իր հերթին չի կարող ամբողջությամբ դադարեցնել Արցախի մասին խոսելը՝ գոնե Արցախի ժողովրդի անվտանգության երաշխավորման առումով։ Ուստի այս հարցում առաջընթացի առանձնահատուկ ակնկալիք չկա»,- ասել է քաղաքագետը։
Դրան զուգահեռ, շարունակել է փորձագետը, Ադրբեջանը սխալ է մեկնաբանում այն ազդանշանները, որոնք գալիս են Հայաստանից։ Ադրբեջանի նախագահը ավելի վաղ հայտարարել էր «դրական ազդանշանների» մասին Հայաստանից, սակայն իրականում Բաքվի մաքսիմալիստական դիրքորոշումը ընդունելի չէ Երևանի համար։ Այս ոչ ճիշտ մեկնաբանության արդյունքում հնարավոր է նոր սրացում թե՛ Լեռնային Ղարաբաղի շփման գծում, թե՛ հայ-ադրբեջանական սահմանին, եզրափակել է Գրիգորյանը։
Նյութը հրապարակման պատրաստեց Կամո Խաչիկյանը
