Ամենաուշը՝ մայիսին. Զելենսկու գրասենյակից հայտնել են ՌԴ-ի հետ խաղաղության համաձայնագիր կնքելու մոտավոր ժամկետը
ՄԻՋԱԶԳԱՅԻՆ
Ռուսաստանի և Ուկրաինայի միջև համաձայնագիրը կարող է կնքվել մեկ-երկու շաբաթվա ընթացքում, ծայրահեղ դեպքում՝ մայիսին։ Նման կարծիք է հայտնել Ուկրաինայի նախագահի աշխատակազմի ղեկավարի խորհրդական Ալեքսեյ Արեստովիչը։
«Կարող եմ ասել հետևյալը՝ կարծում եմ, որ մայիսի սկզբից ոչ ուշ, մայիսի սկզբին, մենք, ամենայն հավանականությամբ, պետք է խաղաղության համաձայնագիր ձեռք բերենք, գուցե այդ ժամկետից շատ ավելի վաղ, տեսնենք, ես նշում եմ առավելագույն ժամկետը: Միգուցե կպայմանավորվենք մոտ ապագայում՝ մեկ-երկու շաբաթ կամ մինչև մայիսի վերջ՝ ևս մի փուլից (բանակցությունների) հետո»,- ասել է նա յութուբյան Feygin Live ալիքում հրապարակված հարցազրույցում։
Հիշեցնենք, որ ռուս-ուկրաինական բանակցությունները շարունակվել են երկուշաբթի՝ մարտի 14-ին, տեսակապի միջոցով։ Ռուսաստանի Դաշնության պատվիրակությունը Ուկրաինայի հետ բանակցություններում, ինչպես նաև Բելառուսում դեմ առ դեմ հանդիպումների ժամանակ գլխավորել է ՌԴ նախագահի օգնական Վլադիմիր Մեդինսկին։ Ուկրաինայի նախագահ Վլադիմիր Զելենսկին հայտարարել է, որ հաջորդ փուլը կկայանա մարտի 15-ին։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
