«Պետք է լինի համախմբում ո՛չ թե անձերի, ո՛չ թե ապագա առաջնորդների, այլ գաղափարի շուրջ». Էդուարդ Շարմազանով
ՔԱՂԱՔԱԿԱՆՈՒԹՅՈՒՆ
Երեկ, ՀՀ երկրորդ նախագահ Ռոբերտ Քոչարյանը հայտնեց, որ ընդդիմության միակ պայքարը պետք է լինի Նիկոլ Փաշինյանին պաշտոնանկ անելը։ Այս թեմայի մասին զրուցել ենք ՀՀԿ խոսնակ Էդուարդ Շարմազանովի հետ։
Հարցին, թե ինչ կարծիք ունեք այս հայտարարության մասին Շարմազանովն ասաց. «Մենք մեկ տարուց ավել է այդ մասին ենք խոսում և եթե ուշադիր հետևեք իմ, Արմեն Աշոտյանի կամ ՀՀ երրորդ նախագահ Սերժ Սարգսյանի հայտարարություններին, ապա ակնհայտ է մեր դիրքորոշումը։ Ես ուրախ եմ, որ Ռոբերտ Քոչարյանը եկել է այդ կարծիքին, նա մեր կարծիքն է արտահայտում, բայց պետք է ասեմ, որ մենք այդ կարծիքը մեկ տարուց ավել արտահայտում ենք։ 2020 թվականի նոյեմբերի 9-ից հետո ՀՀԿ տարբեր գործիչներ, այդ թվում և Սերժ Սարգսյանը բոլոր հրապարակային հարցազրույցներում ասել ենք, որ իշխանության համար չենք պայքարում, և մեր նպատակը միայն իշխանափոխությունն է, և ընդդիմության միակ օրակարգը այս իշխանությանը հեռացնելն է։ Նույն բանն ասվել է դեկտեմբերի 18-ի համագումարի ժամանակ Սերժ Սարգսյանի ծրագրային ելույթում։ Եվ եթե հետևեք մեր ելույթներին, ապա կտեսնեք, որ մենք մեկ տարի է նույն բանն ենք ասում»։
Հարցին, թե արդյոք ՀՀԿ-ականները կմիանան այդ պայքարին Էդուարդ Շարմազանովն ասաց. «Այդ գաղափարի հեղինակը հանրապետականներն են, և պետք է լինի համախմբում ո՛չ թե անձերի, ո՛չ թե ապագա առաջնորդների, այլ գաղափարի շուրջ, իսկ այդ գաղափարը պետք է լինի իշխանափոխությունը։ Այդ գաղափարի հեղինակը ՀՀԿ-ն է, և եթե մեծարգո պարոն երկրորդ նախագահը դա ասել է երեկ, ապա հանրապետականները դա ասել են մեկ տարի շարունակ, և շատ դրական ենք վերաբերվում, որ պարոն երկրորդ նախագահը այդ կարծիքին է»։
Սոնա Գիշյան
