Բաքվի նավահանգիստը նախապատրաստվում է «Զանգեզուրի միջանցքին». սպասվում է բեռնափոխադրումների աճ

eadaily.com–ը գրում է, որ «Զանգեզուրի միջանցք»–ի գործարկումով Բաքվի նավահանգստով ապրանքների փոխադրումը կավելանա: Այդ մասին հայտարարել է Ադրբեջանի գլխավոր ծովային նավահանգստի տնօրեն Թալեհ Զիյադովը։ Նրա խոսքով, խորհրդային տարիներին այն եղել է տարածաշրջանում ապրանքների փոխադրման հիմնական միջանցքը և նյութատեխնիկական ապահովման հիմնական հանգույցը։ «Դրա հզորությունն այն ժամանակ տարեկան երեք միլիոն տոննա էր։ «Զանգեզուրի միջանցք»–ի գործարկումով մենք ակնկալում ենք բեռների հոսքի ավելացում Բաքվի նավահանգստում»,- ասել է Զիյադովը։

Ներկայումս աշխատանքներ են տարվում նավահանգիստը բեռնափոխադրումների ծավալի ակնկալվող աճին նախապատրաստելու ուղղությամբ։ «Հարևան երկրների նավահանգիստների հետ կապեր հաստատելը մեզ դարձնում է տարածաշրջանային խաղացող։ Այսօր մենք մի շարք երկրների համար բեռների տարանցման հանգույց ենք»,- հայտարարել է նավահանգստի տնօրենը։

Միևնույն ժամանակ ադրբեջանական լրատվամիջոցները նշել են, որ աշխատանքներ են տարվում Հորադիզ-Աղբենդ երկաթուղային գծի վերականգնման ուղղությամբ, կազմվել է տեղագրական հատակագիծը և պատրաստվել է դրա վերակառուցման հայեցակարգային ծրագիրը։ Այդ երկաթուղային գիծը համարվում է «Զանգեզուրի միջանցքի անբաժանելի մասը»։ Երկաթուղու 40 կմ մաքրված հատվածում ներկայումս իրականացվում են հողային ենթաշերտի, ինչպես նաև հարակից ​​կառույցների կառուցման աշխատանքներ։ 21 կիլոմետրանոց հատվածում նախապատրաստվել է ենթաշերտը, փռվել է խճաքար։ Ռելսեր անց են կացվել 3 կիլոմետրանոց հատվածում։ Միաժամանակ Հորադիզ - Աղբենդ երթուղու երկայնքով շարունակվում են ենթակառուցվածքների, այդ թվում՝ կամուրջների կառուցումը։ Երկաթուղային գծի վերակառուցումը նախատեսվում է ավարտել մինչև 2022 թվականի վերջը։