Չարժե սպասել շուտափույթ կայունացման Անդրկովկասում
ՀԱՍԱՐԱԿՈՒԹՅՈՒՆ
rossaprimavera.ru-ն գրում է, որ Կովկասում հանգստություն պետք չէ սպասել: Այդ մասին հարցազրույցում ասել է բելառուս ռազմական փորձագետ Եգոր Լեբեդոկը։ Փորձագետը չի կարծում, որ Հայաստանի և Ադրբեջանի միջև շուտով խաղաղության պայմանագիր կստորագրվի։ Նրա կարծիքով, դրանում Լեռնային Ղարաբաղի տարածքները որպես Ադրբեջանի մաս ճանաչելու մասին կետի առկայությունը քաղաքական վնաս է հասցնում Հայաստանի ղեկավարությանը, և նման կետի առկայությունը կարող է բարդացնել ամբողջ փաստաթղթի ստորագրումը։
«Նման փաստաթղթի վրա երկարաժամկետ համատեղ աշխատանք է պետք, և սովորաբար այն հաջողվում է կամ ամբողջական կապիտուլացիայի, կամ այն դեպքում, երբ երկու կողմերն էլ սպառել են հակամարտելու կարողությունը։ Այս դեպքում երկու գործոններն էլ դեռ առկա չեն։ Ուստի, իմ կարծիքով, մոտ ապագայում դժվար թե նման համաձայնագիր ստորագրվի։ Չնայած հնարավոր է, որ բավականին դատարկ թուղթ ստացվի և շուտով խախտվի», - ասել է Լեբեդոկը: Նա կարծում է, որ միջնաժամկետ հեռանկարում Անդրկովկասում կայունացման պետք չէ սպասել, քանի որ Հայաստանի և Ադրբեջանի միջև հակամարտությունից զատ, տարածաշրջանի վրա աճող ազդեցություն կունենա Ռուսաստանի և Թուրքիայի մրցակցությունը։ «Իմ կարծիքով, Ռուսաստանի Դաշնության և Թուրքիայի ներկայիս հարաբերությունները կրում են իրավիճակային բնույթ, այլ ոչ թե ռազմավարական բարեկամություն։ Ուստի իրավիճակային քաղաքականության թուլացմամբ այս տարածաշրջանում պետք է սպասել մրցակցության աճի դրսևորումների առաջիկա 5-10 տարիներին»,- նշել է նա։
Նյութը հրապարակման պատրաստեց Կամո Խաչիկյանը
