Միջազգային հանրությունը հավասարության նշան է դնում․ Նիկոլ Փաշինյանի հերթական ձախողումը

Ադրբեջանական վերջին ագրեսիան հնարավորություն էր կրկին արձանագրելու՝ Հայաստանը Նիկոլ Փաշինյանի մեղքով կորցրել է իր սուբյեկտայնությունը, իսկ մեր երկրին վաղուց այլևս չեն հարգում միջազգային ասպարեզում։ Չնայած Հայաստանի ԱԳՆ-ն միջազգային գործընկերներից ադրբեջանական կողմի գործողություններին «պատշաճ» և «հասցեական» արձագանք էր պահանջում, միջազգային հանրության հայտարարություններն ու կոչերը, այդուհանդերձ, հիմնականում ուղղված են հավասարապես երկու կողմին։

«Մենք երկու կողմերին կոչ ենք անում անհապաղ կոնկրետ միջոցներ ձեռնարկել լարվածությունը նվազեցնելու և հետագա էսկալացիայից խուսափելու համար», - հայտարարել է ԱՄՆ պետքարտուղար Էնթոնի Բլինքենը` կոչ անելով Երևանին և Բաքվին ուղիղ և կառուցողականորեն ներգրավվել մնացյալ բոլոր խնդիրների լուծման գործում՝ ներառյալ սահմանների դեմարկացիան։

Նույնիսկ Ֆրանսիան, որը 44-օրյա պատերազմի ընթացքում քանիցս հայամետ հայտարարություններ էր արել, այս անգամ մեղմիկ քննադատել է երկու կողմերին էլ։ Ֆրանսիայի արտգործնախարար Ժան Իվ Լե Դրիանը, վերահաստատելով պաշտոնական Փարիզի պատրաստակամությունը սահմանազատման և սահմանագծման գործընթացներին աջակցելու գործում, հայտարարել է. «Հայ-ադրբեջանական սահմանի դեմարկացիան և դելիմիտացիան պետք է իրականացվեն բանակցությունների հիման վրա, որոնք «հեռու կլինեն տեղում կատարված փաստերից»։ Երկու կողմին զսպվածության կոչ է անում նաև Միացյալ Ազգերի Կազմակերպությունը։

«Մենք տագնապով ենք հետևում վերջին բռնարարքների մասին տեղեկություններին», - հայտարարել է կառույցի պաշտոնական ներկայացուցչի տեղակալ Ֆարհան Հաքը և կոչ արել բոլոր կողմերին առաջնորդվել եռակողմ հայտարարությունների դրույթներով, բոլոր առկա մտահոգությունները լուծել խաղաղ ճանապարհով՝ երկխոսության միջոցով։ Իր ռազմավարական դաշնակցին օգնելու փոխարեն իրավիճակին ուշադիր հետևելու մասին հայտարարություններ են հնչում նաև Ռուսաստանից։ Թեպետ, այս ամենը լիովին օբյեկտիվ է, ՀՀ իշխանությունները երկրորդ օրն է՝ չեն կարողանում պաշտոնական մի նամակ ձևակերպեն՝ ուղղված ՌԴ-ին և ՀԱՊԿ-ին։ Հայաստանի սահմանին ստեղծված իրավիճակը, միջազգային հանրության անհամարժեք արձագանքները վկայում են՝ Հայաստանի Հանրապետությունը սուբյեկտից վերածվել է օբյեկտի, իսկ օբյեկտի հետ վարվում են ըստ նպատակահարմարության։ Միակ մեղավորն ու պատասխանատուն, իհարկե, գործող ապիկար և դավաճան իշխանություններն են։

Մեսրոպ Ոսկանյան