Ռուս խաղաղապահներն ապահովել են ավելի քան 50 ուխտավորի անվտանգ այցելությունն Ամարաս վանական համալիր. ՌԴ ՊՆ

Ռուսական խաղաղապահ զորակազմի զինծառայողներն ավելի քան 50 ուխտավորի են Ստեփանակերտից ուղեկցել Լեռնային Ղարաբաղի Մարտունու շրջանում գտնվող Ամարաս վանական համալիր՝ մասնակցելու կիրակնօրյա պատարագին: Այս մասին հայտնում է ՌԴ ՊՆ մամուլի ծառայությունը:

«Ավելի քան 50 ուխտավոր է ժամանել պատարագի Ամարաս վանական համալիրում: Նրանց անվտանգությունն ապահովում են ռուս խաղաղապահները: Սրբավայրը գտնվում է կողմերի սահմանազատման գծի մոտակայքում, այդ իսկ պատճառով անվտանգության ապահովման համար անհրաժեշտ է խաղաղապահ զորակազմի զինծառայողների ներկայությունը: Բացի այդ, պատմական և մշակութային արժեքների պահպանման համար ռուս խաղաղապահները հերթապահություն են իրականացնում վանական համալիրի հարակից տարծքում»,- ասել է խաղաղապահ զորակազմի ներկայացուցիչ Սերգեյ Կալինինը:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։