Պատվաստանյութը չբերության չի տանում, չիպ չի, պատվաստվելուց հետո էլ հարս կտանեն. «կարելին» և կատեգորիկ «չի կարելին». բժշկի խորհուրդները

«Պրեսսինգ» հաղորդաշարում Սաթիկ Սեյրանյանի հյուրը Բժշկական գիտությունների թեկնածու, լյարդաբան, «Քովիդ» կենտրոնի վարակաբան Մկրտիչ Մխիթարյանն է:

Բժիշկ Մխիթարյանը շուրջ 11 տարի ուսանել և աշխատել է Մոսկվայում, 2020 թվականին ՌԴ իշխանությունների կողմից կորոնավիրուսի դեմ պայքարի համար արժանացել է երկու շքանշանների:

Մկրտիչ Մխիթարյանը նշել է.

• Կորոնավիրուս տերմինն առաջին անգամ հիշատակվել է 1968 թվականին:

• Այսօր արդեն գոյություն ունեն կորոնավիրուսի 43 տեսակներ, 2 ենթաընտանիքներ և 7 տեսակներ, որոնք մարդու համար կարող են վարակիչ լինել: 100-ից ավելի շտամներ կան, բայց դրանցից Դելտա շտամն ագրեսիվ բնույթ ունի:

• Դելտա շտամի սիմպտոմը նման է սովորական ORV-ի նշաններին՝ հարբուխ, բարձր ջերմություն, մկանային ցավեր և գլխացավեր:

• Միանշանակ է՝ պետք է անպայման պատվաստվել:

• Բնակչության նվազ պատվաստված լինելը հանգեցնում է վարակելիության և մահվան մեծ թվի:

• Բացի ջերմիջեցնող դեղամիջոցներից, հիվանդության առաջին 7 օրվա ընթացքում այլ դեղամիջոցներից պետք է խուսափել, հակաբիոտիկները կատեգորիկ հակացուցված են:

• Հակաբիոտիկները որևէ կապ չունեն կորոնավիրուսի բուժման հետ, դրանք իջեցնում են մարդու իմունիտետն այն ժամանակ, երբ դա չի կարելի:

• Վարակվածության առաջին 7 օրերի ընթացքում դեղամիջոցներով, ներարկումներով միջամտելը սխալ է, միջամտել պետք է միայն բժշկի ցուցումով, երբ նա տեսնում է, որ թոքաբորբն ագրեսիվ ընթացք ունի:

• Իմունային համակարգը պետք է բարձրացնել ճիշտ սննդակարգի, բնական միջոցներով՝ հյութերի և այլն:

• Պատվաստումների նվազ քանակն ու Հայաստանի բնակչության պասիվությունը պայմանավորված է ոչ պատշաճ իրազեկված լինելով:

• Մարդկանց հետ պետք է խոսել, բացատրել, իրազեկել:

• Միջին վիճակագրական տվյալներով՝ պատվաստված մարդիկ ավելի թեթև են տանում վարակը, քան չպատվաստվածները:

• Այնպես, ինչպես մեր հանրությունն է կրում դիմակները՝ նոնսենս է, եթե դիմակը չի փոխվում 2-3 ժամը մեկ, ապա դրա կրումը բացարձակ անիմաստ է:

• Բաց տարածքում, բացարձակ մենակ քայլելիս դիմակ կրելը ևս անիմաստ է:

• Միֆեր են, որ պատվաստանյութը բերում է չբերության:

• Պատվաստանյութը չիպ չի, պատվաստվելուց հետո հարս կտանեն… դրանք հորինված կեղծ միֆեր են:

• Խուճապը, տագնապի զգացումը կորոնավիրուսի դեպքում միայն բացասական էֆեկտ են ունենում, խորացնում են հիվանդությունը:

• Քաղաքացուն այնքան պետք է իրազեկել, որ ինքնակամ գնա պատվաստվելու: