Հարգանքի հարկադրված մատուցում․ Նիկոլ Փաշինյանը ստիպված էր այցելել Սիրադեղյանի ընտանիքին

Վարչապետի պաշտոնը զբաղեցնող Նիկոլ Փաշինյանը երեկ ի վերջո այցելել է Վանո Սիրադեղյանի ընտանիքին։ Կառավարության մամուլի ծառայության փոխանցմամբ՝ Փաշինյանը ցավակցություն է հայտնել Սիրադեղյանի մահվան կապակցությամբ և իր զորակցությունը փոխանցել ընտանիքի անդամներին: Վանո Սիրադեղյանի մահվան մասին հայտնի դարձավ հոկտեմբերի 16-ին, և գրեթե 9 օր Հայաստանի բարձրաստիճան պաշտոնյաներից որևէ մեկը չհամարձակվեց ցավակցություն հայտնել պետական գործչի և անվանի գրողի մահվան կապակցությամբ։ Իսկ Նիկոլ Փաշինյանը, որ չափազանց շատ բանով է պարտական Վանո Սիրադեղյանին, ընդամենը հանձնարարել էր պետական հանձնաժողով ստեղծել՝ Վանո Սիրադեղյանի աճյունը Հայաստան տեղափոխելու համար։

Վստահ ենք՝ Փաշինյանը նույնիսկ այս հարկադրված այցը չէր կատարի, եթե հանրությունը չալեկոծվեր նրա այլանդակ պահվածքից։ Նույնիսկ այն անձինք, ովքեր առանձնապես ջերմ վերաբերմունք չունեն Վանո Սիրադեղյանի նկատմամբ, տարակուսած էին Նիկոլ Փաշինյանի պահվածքից, թե ինչպես կարող է վարչապետի պաշտոնը զբաղեցնող անձը հինգ րոպե ժամանակ «չգտնել» ցավակցական հեռագիր ուղարկելու համար։ Պետական հանձնաժողովը, ի դեպ, օրեր շարունակ անգործության է մատնված, ոչինչ չի ձեռնարկել մահացած մարդու աճյունը Հայաստան բերելու համար։ Վանո Սիրադեղյանի կինն է նրբանկատորեն հայտնել, թե ինքը կկազմակերպի նրա աճոյւնի տեղափոխությունը Հայաստան, ինչը, Ռուզան Տոնոյանի խոսքով ծանր գործ է։ Ինչևէ, միայն 9 օր անց Փաշինյանը բարեհաճեց անձամբ գնալ, ցավակցել, և աղքատիկ մի հաղորդագրություն տարածել՝ կարծես իր պարտքը կատարված համարելով։ Իսկ հանրությունը հերթական անգամ ականատես դարձավ, թե ինչպիսի բարոյական անկում ապրող մարդու է վստահել իշխանության ղեկը Հայաստանում։

Տարոն Ներսիսյան