Հայ-վրացական ուշագրավ այց․ Փաշինյանը հերթական դավադրությունն է նյութում

Նախօրեին ուշագրավ իրադարձություն էր տեղի ունեցել, որը բավական լույս է սփռում Հայաստանի իշխանությունների՝ սեփական ժողովրդի հետ հարաբերվելու և տեղեկատվությունը ամեն գնով թաքցնելու իրականության վրա։ Աշխատանքային այցով Հայաստան էր ժամանել Վրաստանի վարչապետ Իրաքլի Ղարիբաշվիլին։ Ուշագրավ է, որ Բաթումիում շենքի պայթյունից և Վրաստանում ստեղծված իրավիճակից հետո Ղարիբաշվիլին այցը չեղարկելու փոխարեն շտապել էր Երևան, այդ մասին արձանագրում է նույնիսկ Հայաստանի կառավարության մամուլի ծառայությունը, որ Նիկոլ Փաշինյանը իր խոսքն ու շնորհակալությունն է հայտնել Ղարիբաշվիլիին, որ չնայած արտակարգ իրավիճակին չի չեղարկել իր այցը Հայաստան։ Հայաստանի կառավարությունը իր պաշտոնական հաղորդակցության մեջ նշել էր, թե զրուցակիցները քննարկել են Հայաստան – Վրաստան համագործակցության օրակարգը և հեռանկարները, մտքեր են փոխանակվել տարածաշրջանային իրավիճակի և զարգացումների շուրջ։ Կողմերը վերահաստատել են բարեկամական կապերը հետևողականորեն խորացնելու պատրաստակամությունը և պայմանավորվել շարունակել ակտիվ երկխոսությունը։ Ինչպես տեսնում եք որևէ բառ այդպես էլ չկա, թե ինչ է իրականում խոսվել։ Բոլոր մանրամասները բացահայտել է արդեն Ղարիբաշվիլին, ավելի ուշ «Թվիթերի» իր էջում։

«Իմ այցի շրջանակներում կայացել են արդյունավետ բանակցություններ վարչապետ Նիկոլ Փաշինյանի հետ»,- գրել է Ղարիբաշվիլին․ Վրաստանի վարչապետի խոսքով հանդիպման ընթացքում քննարկվել են երկկողմ համագործակցությանը վերաբերող հարցեր, անդրադարձել են Հարավային Կովկասի տարածաշրջանի համար նոր խաղաղ նախաձեռնությանը։ Հիշեցնենք, որ Վրաստանի կառավարության ղեկավարը պատրաստակամություն էր հայտնել ակտիվ միջնորդություն իրականացնել Հայաստանի և Ադրբեջանի միջև։

Ուշագրավ է, որ վրացի բազմաթիվ վերլուծաբաններ, այդ թվում նաև հայտնի քաղաքագետ Գելա Վասաձեն նշում են, թե բացի այս ամենը քննարկվել են նաև հանրահայտ «3+3» նախագիծը, որը առաջարկել էր Թուրքիայի նախագահը և այժմ ակտիվորեն առաջ են մղում Ռուսաստանի կողմից։ Այդ նախագծով պետք է մեկ ֆորմատ ձևաչափի մեջ համատեղվեն Հայաստանը, Վրաստանը, Ադրբեջանը, Թուրքիան, Իրանը և Ռուսաստանը։ Ինչպես տեսնում եք, Հայաստանի կառավարությունը հերթական անգամ փորձում է իր սեփական երկրի քաղաքացիներից ծածուկ պահել, թե ինչ է իրականում քննարկում, և Հայաստանի Հանրապետության քաղաքացիները այնուհետև իրավիճակին և քննարկված հարցերին տեղեկանում են Վրաստանի վարչապետի, վրացի վերլուծաբանների և այլ անձանց օգնությամբ։ Ըստ երևույթին Նիկոլ Փաշինյանը հերթական դավադրությունն է նյութում Հայաստանի դեմ և ամեն գնով փորձում է այդ տեղեկությունը ծածուկ պահել սեփական երկրի քաղաքացիներից։ Առաջիկա օրերին, երբ իրավիճակը թեժանա և ավելի առարկայական դառնան այս խոսակցությունները, Նիկոլ Փաշինյանի կողմից կարող ենք սպասել հերթական բեմադրությունների՝ ինչ-ինչ անձանց ձերբակալության, կամ այլ մեդիամանիպուլացիաների տեսքով, ինչը նշանակում է, որ Փաշինյանը փորձելու է տեղեկատվական աղմուկի տակ հերթական հակահայկական քայլը իրականացնել։

Հակոբ Կարապետյան