Ղազինյանի ահից օրենք են փոխում․ ուսապարկերի մասնագետը բացահայտեց

Ազգային ժողովի «Քաղաքացիական պայմանագիր» խմբակցությունը ձեռնամուխ է եղել կանոնակարգ օրենքը փոփոխելու նախաձեռնությանը, որպեսզի վերջնականապես փակի պաշտպանության և անվտանգության հարցերի հանձնաժողովի փոխնախագահի ընտրության թեժ հարցը։ Վեց անգամ հանձնաժողովը՝ Անդրանիկ Քոչարյանի գլխավորությամբ, մերժեց «Հայաստան» խմբակցության պատգամավոր Արթուր Ղազինյանի թեկնածությունը, հաջորդ շաբաթ կրկին ստիպված է լինելու քննարկել այդ հարցը, և այժմ փորձում են օրենքի փոփոխությամբ կանխել հնարավոր նոր առաջադրումները։

Պատգամավոր Վահագն Ալեքսանյանը խոստովանել է, որ աշխատանքներ են սկսել՝ օրենքի նախագիծ ներկայացնելու ուղղությամբ, որով հանձնաժողովի փոխնախագահի պաշտոնում ընդդիմությունը ստիպված կլինի նոր թեկնածու առաջադրել, եթե իշխանությունը երկու անգամ անընդմեջ չի ընտրում թեկնածուին։ Ալեքսանյանը երեկ կայացած ճեպազրույցներում հոխորտում էր, թե Արթուր Ղազինյանն ընդհանրապես վախ ներշնչող կերպար չէ։

«Եվ, երկրորդն էլ ոչ մի առանձնահատուկ լիազորություններ չունի հանձնաժողովի փոխնախագահը, բացի նրանից, որ կարող է նիստը վարել, եթե նախագահողը բացակայում է։ Իսկ թե ինչու չենք ընտրում, կարող ենք վեց ժամանոց վիդեո ֆորմատ տրամադրել, թե ինչու չենք ընտրում․ մեկ այն, որ նա չի ծառայել ԶՈՒ–ում, դա, իհարկե, մի կողմ, բայց դրա հետ մեկտեղ նա բացարձակապես չի տիրապետում զինված ուժերին վերաբերող հարցերին»,– ասել է Ալեքսանյանը։

Կարելի է կարծել, թե «Քաղպայմանագրի» պատգամավորներն են տիրապետում ռազմական գործին, մինչդեռ դա բոլորովին էլ այդպես չէ։ Ըստ էության, իշխանականները պարզապես վախենում են Ղազինյանից, և հստակ հրահանգ ունեն ցանկացած գնով նրան չընտրել հանձնաժողովի փոխնախագահի պաշտոնում։ Իսկ իրենց տրված փաշինյանական հրահանգը կատարելու համար պատրաստ են ցանկացած հիմարություն արտաբերելու, Ղազինյանին հնարավոր ու անհնարին բոլոր մեղքերում մեղադրելու։ Այդուհանդերձ, նույնիսկ կանոնակարգի փոփոխությունները արտահերթ նիստով ընդունելու դեպքում դեռ առնվազն երկու-երեք անգամ ստիպված են լինելու հանձնաժողովի նիստերում առերեսվելու Արթուր Ղազինյանի և մյուս ընդդիմադիրների արդար զայրույթին, Փաշինյանի և նրա կողմնակիցների ապիկարության ապացույցներին։

Արտաշես Մեսրոպյան